7 мамыр – Отан қорғаушылар күніне орай 18404 әскери бөлімнің ұйымдастыруымен ашық есік күні өтті. Іс-шара 37-ші десанттық-шабуылдау бригадасы аумағында өткізіліп, оған Талдықорған қаласындағы мектептердің жоғары сынып оқушылары қатысты.
Ашық есік күні барысында оқушылар десантшы сарбаздардың күнделікті тыныс-тіршілігімен жан-жақты танысты. Әскери қызметшілер қонақтарға жатын орындарын, тұрмыстық жағдайларын көрсетіп, әскери өмірдің қыр-сырымен бөлісті. Сонымен қатар, сарбаздардың киім үлгілері таныстырылып, парашюттік секірістің дайындығықалай өтетіні іс жүзінде көрсетілді.
Іс-шара аясында оқушылар әскери асханамен танысып, сарбаздардың тамақтану тәртібін көрді. Сондай-ақ, қару-жарақ түрлері көрсетіліп, атыс дайындығы мен тактикалық жаттығулар ұйымдастырылды. Бұл көріністер жасөспірімдердің ерекше қызығушылығын тудырып, олар өздерін толғандырған сұрақтарын қойып, әскери мамандардан нақты жауап алды.
Шараның негізгі мақсаты – жас буынның бойында патриоттық сезімді қалыптастыру, Отанға деген сүйіспеншілікті арттыру және әскери қызметтің маңыздылығын түсіндіру болды. Ұйымдастырушылардың айтуынша, бұл мақсат өз деңгейінде жүзеге асқан. Себебі, қатысушы оқушылардың жүзінен Отанға деген мақтаныш пен жалынды жігер анық байқалды.
– Осындай ашық есік күндері жастардың әскери қызметке қызығушылығын арттырып қана қоймай, олардың бойында патриоттық рухты нығайтады. Біз болашақта Отанын сүйетін, елін қорғай алатын жастардың көп боларына сенімдіміз. Мұндай шаралар өз нәтижесін беріп келеді, – дейді 18404 әскери бөлім командирінің тәрбие және идеологиялық жұмыстар жөніндегі орынбасарының міндетін уақытша атқарушыкапитан Владислав Гасс.
Қорыта айтқанда, ашық есік күні жасөспірімдер үшін танымдық әрі тәрбиелік маңызы зор іс-шара болды. Мұндай бастамалар ел болашағы – жастарды отансүйгіштікке тәрбиелеуде маңызды рөл атқарады.
Жетісу гарнизонының баспасөз қызметі
