Жетісу облысында көлік инфрақұрылымын дамыту бағытындағы жұмыстар ерекше қарқын алды. Өткен төрт жылдың ішінде өңірдегі жергілікті маңызы бар 1 610,6 шақырым автомобиль жолына жөндеу жүргізілді. Аталған көрсеткіш шеңберінде облыстық маңызы бар 660,4 шақырым жол мен 148 елді мекендегі 950,2 шақырым ауылішілік көше қамтылды. Соның ішінде облыс орталығының өзінде шамамен 335 шақырым жол жаңартылды, – деп хабарлайды 7-su.kz ақпараттық порталы.
Биыл Талдықорған қаласында жол құрылысы мен жөндеу жұмыстарының ауқымы тіпті кеңейе түспек. Жоспар бойынша 118 көшені қамтитын жобалар аясында 70 шақырымнан астам жолға жаңа асфальт төселеді. Сәуір айының ортасынан бастап қаланың орталық бөлігіндегі сегіз негізгі көшеде орташа жөндеу жұмыстары басталып кетті. Атап айтқанда, Абай, Абылай хан, Ескелді би көшелері мен Н. Назарбаев даңғылында, сондай-ақ Шевченко, Желтоқсан, Ақын Сара, Біржан сал көшелерінде құрылыс қарқынды жүруде. Бұл учаскелердің жалпы ұзындығы 30,2 шақырымды құрайды.
Маусымдағы жөндеу жұмыстарының басты жаңалығы – инновациялық технологияларды қолдану. Аталған көшелердің барлығында икемді люктер орнатылмақ. Икемді люк – кәріз құдығының бетон сақинасына емес, тікелей жол жабынына бекітілетін жетілдірілген құрылым. Мұндай тәсіл жолдың тегістігін сақтап, көлік жүрісін жеңілдетеді. Биыл қала бойынша 694 осындай люк орнату көзделген. Бұдан бөлек, «Жастар-1», «Құлагер» және «Бірлік» шағын аудандарындағы ондаған көшенің құрылысы аяқталып, «Көктал» тұрғын алабы мен 3-бөлімшедегі жұмыстар жалғасын табады.
Қазіргі уақытта облыс орталығында 15 мердігер ұйым мен 200 бірлік арнайы техника үздіксіз жұмыс істеп жатыр. Жөндеу барысында жол қауіпсіздігіне де баса назар аударылған. Жоспарға сәйкес 100 жол белгісі ауыстырылып, 300 жаңа белгі орнатылады. Абылай хан мен Тынышбаев көшелерінің қиылысына жаңа бағдаршам қойылмақ. Жол таңбаларын сызуда термопластик материалы қолданылады. Бұл материалдың ерекшелігі – түнгі уақытта анық көрінуі және ұзақ мерзімге шыдамдылығы, бұл жол-көлік оқиғаларының алдын алуға септігін тигізеді.
Жалпы алғанда, Жетісу облысындағы автомобиль жолдарының ұзындығы 4 035 шақырымды құрайды. Оның 1 050 шақырымы республикалық маңызы бар, ал 2 985 шақырымы жергілікті маңызы бар жолдар санатына жатады. Инфрақұрылымды жүйелі түрде жаңғырту өңірдің экономикалық әлеуетін арттырып, тұрғындардың қауіпсіз әрі жайлы қозғалысын қамтамасыз етуге бағытталған.
