Қазақстанда мұнай өңдеу тереңдігін арттыру бағытындағы жоспарлы жұмыстар өз жемісін беріп жатыр. 2025 жылдың қорытындысы бойынша еліміздегі үш ірі мұнай өңдеу зауытында мұнай өңдеудің орташа тереңдігі 87,4 пайыздан 90 пайызға дейін жетті, – деп хабарлайды 7-su.kz ақпараттық порталы Tizgin.kz сайтына сілтеме жасап.
Мұнай өңдеу саласындағы көрсеткіштердің өсуі барлық негізгі кәсіпорындарда байқалады. Атап айтқанда, Атырау мұнай өңдеу зауытында көрсеткіш 85 пайыздан 88 пайызға, Шымкент зауытында 86 пайыздан 88 пайызға дейін өсті. Ал Павлодар мұнай-химия зауыты 94 пайыздық көрсеткішке қол жеткізіп, сала бойынша көш бастап тұр. Мұндай оң нәтижелерге ақ мұнай өнімдерінің үлесін арттыру және Павлодардағы битум өндірісін 426 мың тоннаға дейін ұлғайту арқылы қол жеткізілді.
2025 жылдың қорытындысы бойынша стратегиялық маңызы бар жанар-жағармай материалдарын өндіру көлемі айтарлықтай өсті. Автобензин өндірісі 5,7 млн тоннаға жетіп, өткен жылмен салыстырғанда 107 пайызды құрады. Дизель отынының өндірісі де қарқынды өсіп, 6,1 млн тоннаға (116 пайыз) жетті. Алдағы уақытта зауыттарды жаңғырту және қуаттылықтарын кеңейту арқылы мұнай өңдеу тереңдігін 94 пайызға дейін жеткізу көзделіп отыр. Көрсеткіштердің өсуі ішкі нарықты сапалы отандық өніммен қамтамасыз етіп, еліміздің энергетикалық тәуелсіздігін нығайтуға мүмкіндік береді.
