Қазақстан Республикасы Көлік министрлігінің Автомобиль көлігі және көліктік бақылау комитеті жолаушылар теміржол тасымалы саласындағы мемлекеттік бақылау жұмыстарын күшейтті. Аумақтық инспекциялар жүргізген тұрақты тексерулердің мақсаты – тасымал қауіпсіздігін қамтамасыз ету және қызмет көрсету сапасын арттыру, – деп хабарлайды 7-su.kz ақпараттық порталы.
Биылғы жылдың алғашқы төрт айының қорытындысы бойынша 280 жолаушылар пойызы бақылаудан өтті. Ауқымды іс-шаралар барысында Жолаушыларды тасымалдау қағидаларын бұзудың 569 дерегі тіркелді. Инспекторлар билетсіз жүрген 88 жолаушыны және тиісті құжаттары рәсімделмеген 1 308 келі жүкті анықтады. Тексеру кезінде вагондардың техникалық жай-күйіне, сервистік қызмет көрсету деңгейіне, сондай-ақ мүгедектігі бар азаматтар мен жүріп-тұруы шектеулі жандарға жасалған жағдайларға баса назар аударылды.
Қауіпсіздік талаптарына сәйкес келмейтін жылжымалы құрамды пайдалануға жол бермеу мақсатында қатаң шаралар қабылданды. Тексеріс нәтижесінде техникалық ақаулары анықталған 9 жолаушылар вагонын пайдалануға уақытша тыйым салынды. Комитет өкілдері жолаушылар тасымалының сапасын жақсартуға бағытталған мұндай бақылау жұмыстары алдағы уақытта да жалғасатынын мәлімдеді. Теміржол саласындағы тәртіпті қалыпқа келтіру – жолаушылардың жайлылығы мен қауіпсіздігінің басты кепілі.
