Жетісу облысының диқандары биылғы көктемгі дала жұмыстарының маңызды кезеңін сәтті тәмамдады. Өңірдегі екі ірі қант зауытының өндірістік қуаттылығын ескере отырып, биыл қант қызылшасы 13 мың гектар алқапқа егілді. Аталған көрсеткіш өткен жылмен салыстырғанда 708 гектарға артық, – деп хабарлайды 7-su.kz ақпараттық порталы.
Өңірдегі қант қызылшасы алқаптарының кеңеюі еліміздің қант тәуелсіздігін қамтамасыз ету жолындағы стратегиялық қадам болып саналады. Науқан кезінде 124 сеялка жұмылдырылып, оның ішінде сервистік-дайындау орталықтарының 47 техникасы техникалық қолдау көрсетті. Диқандар жалпы көлемі 17,5 мың егістік бірлігін пайдаланса, оның басым бөлігін (12,7 мың бірлік) Ақсу және Көксу қант зауыттары жеткізіп берді. Сонымен қатар, аграрлық сектор өкілдері қажетті мөлшерде минералды тыңайтқыштармен және жеңілдікпен берілетін дизель отынымен толық қамтамасыз етілді.
Қазіргі уақытта Жетісу өңірінде 540-қа жуық шаруашылық тәтті түбір өсірумен айналысады. Солардың бірі – Көксу ауданындағы «Жалайыр» шаруа қожалығы. Өткен жылы бұл қожалық 40 гектарға дән сепсе, биыл егіс көлемін 82 гектарға дейін ұлғайтқан. Шаруашылық басшысы Мақсат Әбдірахмановтың айтуынша, мемлекет тарапынан көрсетілетін қолдау шаралары жұмыстың өнімділігін арттыруға септігін тигізеді. «Аграрлық несие корпорациясы» арқылы 49 млн теңге көлемінде қаржылай көмек алған диқандар жаңа ауыл шаруашылығы техникасын лизингке алып, заманауи технологияларды енгізуде.
Облыстық ауыл шаруашылығы басқармасының болжамы бойынша, биылғы маусымда қант қызылшасынан шамамен 585 мың тонна өнім жинау жоспарланған. Жиналған шикізат толығымен Ақсу және Көксу қант зауыттарында өңделеді. Бұл көрсеткіш жергілікті өндірістің әлеуетін арттырып қана қоймай, ішкі нарықты отандық өніммен қамтамасыз етуге, жаңа жұмыс орындарын сақтауға және ауыл экономикасын нығайтуға мүмкіндік береді. Оңтайлы агротехникалық шаралар мен диқандардың қажырлы еңбегі күзгі жиын-терім науқанында мол өнім алуға негіз болмақ.
