Адам өміріндегі ең қастерлі мекен – туған үйдің табалдырығы. Сол табалдырықтан аттаған сәттен жүрек мейірімнің жылуын сезініп, жан дүниеге жақсылықтың алғашқы сәулесі құйылады. Бала сол ортада өмірдің мәнін ұғынады, үлкеннің өнегесін көріп, ізгіліктің дәнін көкірегіне сіңіреді. Адам бойындағы ең асыл қасиеттердің бастау бұлағы да құтты ұядан тарайды.
Қазақ халқы ежелден шаңырақтың қасиетін ерекше қастерлеген. «Отан – отбасынан басталады» деген ұлағатты сөздің төркіні де осы түсініктен тамыр тартады. Бір үйдің берекесі мен бірлігі тұтас елдің баянды болашағына ықпал етеді. Себебі, әрбір тату тірлік пен жарасымды қарым-қатынас қоғам тынысының кеңеюіне ашылған жол екені айқын.
Әкенің парасаты мен ананың мейірімі ұрпаққа бағыт беретін қос шамшырақ секілді. Бірі биікке жетелесе, бірі жүрекке жылу сыйлайды. Сол тәліммен өскен ұл мен қыз бойына кішіпейілділік, еңбекқорлық, жанашырлық, үлкенге құрмет, кішіге ізет сынды қасиеттерді дарытады. Осындай құндылықтар ұрпақтан ұрпаққа жалғасып, рухани сабақтастықтың алтын арқауына айналады.
Қазіргі алмағайып заманда ұлттық болмысты сақтап, ізгі дәстүрді жалғау айрықша маңызды. Тіршіліктің қарқыны үдеген сайын адам жанына тыныштық пен сүйеніш сыйлайтын мекеннің қадірі арта түсуде. Жақындардың жан жылуы мен шынайы ықыласы кез келген жанға күш беріп, өмірге сенім ұялатады.
Мерейлі күннің мәні де осында. Ол әр жанды жақындарының қадірін тереңірек сезінуге, үлкенге құрмет көрсетіп, кішіні қамқорлыққа бөлеуге үндейді. Ағайынның арасы ажырамай, дастарқанның берекесі тасып, төрден шат күлкі үзілмеген отбасының шырағы қашанда биік.
Береке қонған үйдің босағасы берік болады. Мейірім мен татулық салтанат құрған жерде бақ та баянды. Әр шаңырақтан шаттықтың нұры төгіліп, жүректерге жылылық ұяласа, елдің де еңсесі асқақтай түсері анық. Өмірдің шынайы бақыты да дәл осы құндылықтардың қадірін ұғына білуде.
Медет ЖҰМАБАЙ
