Жетісу өңірінің інжу-маржаны саналатын Алакөл жағалауында демалуды жоспарлаған отандастарымыз үшін жағымды жаңалық бар. Ұлттық тасымалдаушы компания биылғы жазғы маусымда 4,2 млн жолаушыға қызмет көрсетуді көздеп отыр. Оның ішінде 230 мыңға жуық адам курорттық аймаққа теміржол арқылы жетеді, – деп хабарлайды 7-su.kz ақпараттық порталы inbusiness.kz сайтына сілтеме жасап.
Маусымдық сұраныстың күрт артуына байланысты Қазақстан темір жолы жаз айларында 15 қосымша теміржол бағытын іске қосады. Алакөлге қатынайтын пойыздар еліміздің ірі қалаларынан, атап айтқанда Астана, Алматы, Семей, Өскемен, Қызылорда және Павлодардан қатынайтын болады. Жолаушылар үшін №54/53 және №253/254 «Нұрлы жол – Достық», №207/208, №211/212, №221/222 «Алматы – Достық» бағыттары, сондай-ақ Шығыс Қазақстаннан қатынайтын арнайы рейстер қарастырылған. Сонымен қатар Қызылорда, Алматы және Павлодардан қосымша тіркеме вагондар ұйымдастырылып, жол жүру билеттерінің қолжетімділігі қамтамасыз етіледі.
«Жазғы маусымда жолаушылар тасымалына сұраныс жыл сайын артады. Әсіресе курорттық аймақтар мен ірі қалаларға қатынайтын бағыттарға қызығушылық жоғары. Осы кезеңде жолаушыларға қызмет көрсету үшін 2 мыңнан астам вагон, оның ішінде стандартты вагондар, «Тальго» құрамдары және электр пойыздары пайдаланылады. Вагондардың 86 пайызы кондиционер жүйесімен жабдықталған», – деді «Жолаушылар тасымалы» АҚ Басқарма төрағасы Дияр Нүсіпқожанов.
Барлық жылжымалы құрам техникалық тексеруден және санитариялық өңдеуден өтіп, жолаушылардың жайлылығы үшін мультимедиялық ойын-сауық порталымен жабдықталған.
Ауқымды тасымал науқанына дайындық аясында туристік операторлар мен «Атамекен» Ұлттық кәсіпкерлер палатасы өкілдерінің қатысуымен жұмыс кеңестері өткізілді. Ерекше қажеттілігі бар азаматтар үшін мамандандырылған вагондар қарастырылып, вокзалдарда көмек көрсету қызметтері онлайн режимде қолжетімді болады. Демалыс маусымындағы мұндай инфрақұрылымдық қолдау ішкі туризмнің дамуына серпін беріп, Алакөл жағалауына келушілер санын арттыруға мүмкіндік береді. Пойыз билеттерін алдын ала рәсімдеу арқылы жолаушылар өз сапарын жайлы әрі қауіпсіз жоспарлай алады.
