Сербия астанасы Белградта өткен дәстүрлі халықаралық «Белград жеңімпазы» бокс турнирінде Қазақстан құрамасы бір алтын медаль еншіледі, – деп хабарлайды 7-su.kz ақпараттық порталы.
Ұлттық құрама сапындағы жалғыз чемпион атанған боксшы – Нұрасыл Төленбек.
60 келіге дейінгі салмақ дәрежесінде өнер көрсеткен қазақстандық былғары қолғап шебері финалда кубалық Винсент Луис Энрикемен қолғап түйістірді. Жекпе-жек барысында Нұрасыл белсенді қимылымен, дәл соққыларымен ерекшеленіп, төрешілердің бірауыздан шығарған шешімімен айқын жеңіске жетті.
Сондай-ақ, Қазақстан құрамасының тағы екі өкілі финалға дейін сүрінбей жетті. 70 келі салмақта сынға түскен Нұрбек Мурсал шешуші кездесуде черногориялық Милош Рогановичке есе жіберді. Ал 90 келіге дейінгі салмақта жұдырықтасқан Ибрагим Бетаев кубалық Уильямс Нельсонмен болған тартысты айқаста жеңіліп қалды. Екі боксшы да төрешілердің екіге бөлінген шешімімен күміс жүлдегер атанды.
Осылайша, Қазақстан құрамасы Белградтағы беделді халықаралық турнирді бір алтын және екі күміс медальмен қорытындылады.
