Талдықорғанда облыстық прокуратураның бастамасымен «Заң мен тәртіп» идеологемасын жүзеге асыруға бағытталған апталық өтті. Негізгі мақсат – жасөспірімдердің құқықтық сауаттылығын арттырып, заңға деген құрметті қалыптастыру.
Апталық аясында оқушылар кибербуллинг, интернет-алаяқтық, дропперлік әрекеттердің алдын алу тақырыптарында түрлі сахналық көріністер қойып, қоғамдағы өзекті мәселелерді шығармашылық тұрғыда көтерді. Сала мамандарының айтуынша, құқықтық тәрбие мен дұрыс құндылықтарды қалыптастыру мектеп қабырғасынан басталуы тиіс. Себебі жас ұрпақ ненің дұрыс, ненің бұрыс екенін білім ордасында үйренеді.
Жобаға қаладағы 28 мектептің оқушылары қатысып, олардың арасынан 6 команда үздік деп танылды. Ұйымдастырушылар мұндай бастамалардың тәрбиелік мәні жоғары екенін атап өтті. Өйткені құқықтық білім – қоғамдағы тұрақтылықтың, тәртіп пен қауіпсіздіктің басты кепілі.
«Құқық бұзушылықтың алдын алу» атты облыстық қорытынды шара барысында оқушылар өздерінің шығармашылық қабілеттері мен белсенді азаматтық ұстанымдарын көрсетті. Сонымен қатар құқықтық мәдениетті насихаттауға үлес қосты.
Іс-шараны ұйымдастыруға облыстық прокуратура, облыстық полиция департаменті және облыстық білім басқармасы мұрындық болды. Мамандардың пікірінше, осындай бірлескен жұмыстар жас буынның саналы әрі жауапкершілігі жоғары азамат болып қалыптасуына оң әсер етеді.
Апталық 6 кезеңнен тұрды. Атап айтқанда, құқық бұзушылықтың алдын алу тақырыбындағы флешмоб, театрлық қойылым, қысқаметражды бейнеролик, үгіт-насихат тобының жұмысы, жасанды интеллект платформалары арқылы әзірленген сторителлинг-квест пен қысқаметражды мультфильмдер, сондай-ақ нашақорлықтың алдын алуға арналған интерактивті іс-шаралар ұйымдастырылды.
Посмотреть эту публикацию в Instagram
Аяулым Шынгаева
