Вьетнамда өтіп жатқан 23 жасқа дейінгі спортшылар арасындағы (U23) Азия чемпионатында Жетісу өңірінің балуандары жоғары деңгейде өнер көрсетіп, ел қоржынын жүлдемен байытты. Бозкілемде бағы мен бабы қатар шапқан спортшыларымыздың нәтижелері келесідей:
Грек-рим күресінен сынға түскен Жеңіс Ерасыл 87 келі салмақ дәрежесінде Азия чемпионатының күміс жүлдегері атанды. Ол жартылай финалдық бәсекеде үндістандық балуанды анық басымдықпен қапы қалдырып, финалға жолдама алған болатын.
Еркін күрестен 86 кг салмақ дәрежесінде бақ сынаған Абылайхан Үзембаев та айтулы доданың күміс жүлдесіне (2-орын) ие болды. Абылайхан жартылай финалда Оңтүстік Корея спортшысын 11:1 есебімен ұтып, шеберлігін дәлелдеді.
Дүркіреген доданың екінші жарыс күнінде еркін күрестен Шаттық Алайдар үздік өнер көрсетті. Ол кілем үстінде Моңғолия мен Өзбекстаннан келген палуандарды жеңіп, қола жүлдені (3-орын) қанжығалады.
Санжар СҰЛТАНҒАЗЫ
