Мемлекет басшысы Қасым-Жомарт Тоқаевтың «Кітап оқу мәдениетін дамыту және зерделі ұлт қалыптастыру жөніндегі шаралар туралы» Жарлыққа қол қоюы – елдің рухани кеңістігін жаңғыртуға бағытталған маңызды шешімдердің бірі. Бұл құжат әдебиет пен ағартушылық саласын жаңа деңгейге көтеріп қана қоймай, қоғамның интеллектуалдық әлеуетін арттыруға тың серпін береді.
Соңғы жылдары Президент ұлттық құндылықтарды дәріптеу, жастардың білімге құштарлығын арттыру, оқу мәдениетін қалыптастыру мәселелерін тұрақты түрде көтеріп келеді. Мемлекет басшысы түрлі жиындар мен Ұлттық құрылтай отырыстарында кітап оқудың маңызын бірнеше мәрте атап өтіп, бәсекеге қабілетті ұлт қалыптастырудың негізгі тетіктерінің бірі білім мен парасат екенін айтқан болатын. Жаңа Жарлық осы бастамалардың заңды жалғасы.
Шын мәнінде, өркениетті қоғамның басты көрсеткіші – оның оқу мәдениеті. Тарихқа көз жүгіртсек, ғылым мен мәдениетте биік жетістікке жеткен мемлекеттердің барлығы білім мен әдебиетті дамытуға айрықша көңіл бөлген. Кітап – ұлттың тарихи жадын сақтайтын, дүниетанымды байытатын, адамды ізденіс пен танымға жетелейтін рухани қазына. Сондықтан оқуға деген ықыласты арттыру – болашаққа салынған инвестициямен пара-пар.
Жарлықта кітапханаларды заманауи талаптарға сай дамыту, цифрлық технологияларды кеңінен енгізу, Ұлттық цифрлық кітапхана платформасын қалыптастыру, отандық әдебиетті қолдау және ұлттық мұраны халықаралық деңгейде насихаттау секілді маңызды бағыттар қамтылған. Бұл міндеттердің жүзеге асуы ақпаратқа қолжетімділікті жақсартып, әдебиет саласының дамуына жаңа мүмкіндіктер ашады.
Бүгінде кітапхана ұғымының мазмұны айтарлықтай өзгерді. Ол бұрынғыдай тек кітап сақталатын орынмен шектелмейді. Қазіргі таңда кітапханалар – білім алмасатын, ғылыми ізденіс жүргізілетін, шығармашылық бастамалар жүзеге асатын және мәдени құндылықтар тоғысатын қоғамдық орталыққа айналып келеді. Осы тұрғыдан алғанда, оларды жаңа форматта дамыту – заман талабынан туындаған қажеттілік.
Мемлекет басшысының бұл бастамасы жастардың оқу сауаттылығын жетілдіру, ұлттық әдебиеттің беделін көтеруге және қоғамдағы рухани құндылықтарды нығайтуға ықпал етпек. Әсіресе цифрлық технологиялардың қарқынды дамуы жағдайында кітап пен оқырман арасындағы байланысты күшейту өзекті мәселеге айналып отыр. Сондықтан Жарлықта белгіленген міндеттер елдің мәдени-интеллектуалдық дамуына қызмет ететін маңызды стратегиялық бағдар ретінде бағалануға тиіс.
Ұлттың келешегі оның білім деңгейімен өлшенеді. Ал білімнің бастауы – оқу, таным және ізденіс. Осы орайда Президент бастамасы азаматтардың кітапқа деген қызығушылығын арттырып, ойлы, білімді әрі бәсекеге қабілетті қоғам қалыптастыру жолындағы маңызды белес болмақ.
Ақерке САҒЫНБЕК,
облыстық С. Сейфуллин атындағы орталық кітапханасының
оқырмандарға қызмет көрсету бөлімінің кітапханашысы
