Қазақта ұстаздан асқан ұлы мамандық жоқ. Әкім де, хәкім де, елбасы да, қолбасы да ұстазға бас иеді. «Менің атым Қожа» фильміндегі Рахманов ағай: «Ұстаз – баланың шамшырағын жаға білу керек» дейтін еді ғой. Қандай ұлы сөз?! Апта ортасында облыс әкімі Бейбіт ИСАБАЕВ Мемлекет басшысының Жарлығымен марапатталған жетісулық «шамшырақ жағушыларға» құрмет көрсетті.
Аймақ басшысы келелі кездесуде ұстаздар қауымын әуелі Рәміздер күнімен құттықтап, артынша болашақтың негізін қалар ұрпақ тәрбиелеп отырған педагогтардың еңбегі турасында әңгіме тінін тарқатты.
– Халқымызда: «Ұстазы жақсының – ұстанымы жақсы» деген асыл сөз бар. Өңір педагогтары білім саласындағы өзгерістерді қолдап, жүзеге асыруға үлес қосып, ел болашағы үшін еңбек етіп келеді. Биыл оқушыларымыз республикалық және халықаралық олимпиадалар мен байқауларда жоғары нәтижелерге қол жеткізді. Осындай жетістіктің артында үлкен еңбек жатыр. Бүгін берілген мемлекеттік наградалар көпжылдық қажырлы еңбек, төгілген тер, ұлт болашағын қалыптастырудағы қарекетке мемлекет тарапынан берілген әділ баға мен шынайы құрмет, – деді Бейбіт Исабаев.
Мұнан соң, аймақ басшысы ұстаздарды марапаттады. Әкім қолынан Талдықорған қаласындағы Мұхтар Арын атындағы №24 мамандандырылған лицейдің математика пәнінің мұғалімі Зиялы Әбілова, Бақтыбай Жолбарысұлы атындағы №18 мектеп-лицейдің қазақ тілі мен әдебиеті пәнінің мұғалімі Эльвира Досаева, Текелі қаласындағы №7 орта мектептің информатика пәнінің мұғалімі Виктория Комелькова «Құрмет» орденімен марапатталды. Ал Ескелді ауданындағы Жетісу орта мектебінің география пәні мұғалімі Жарқынай Болысбекова, Сарқан ауданындағы Жетісу орта мектебінің физика пәні мұғалімі Дана Жәкенова және Алакөл ауданындағы Ілияс Жансүгіров атындағы орта мектептің бастауыш сынып мұғалімі Кенжегүл Қалияева «Ерен еңбегі үшін» медаліне ие болды.
Жиын барысында білім беру саласына елеулі үлес қосып, алғыс алған ұстаздар да аймақ басшысына ілтипатын білдірді.
– Бұл марапат бір адамның емес, тұтас ұжымның, бүкіл педагогикалық қауымдастықтың еңбегіне берілген баға. Бізге артылған сенім мен жауапкершілікті ақтап, саналы әрі білімді ұрпақ тәрбиелеу үшін бар күшімізді саламыз. Аймақта заманауи мектептер салынып, білім беру нысандары жаңартылуда. Бұл бізге жаңа технологияларды пайдалана отырып, оқыту үдерісін шығармашылықпен ұштастыруға кең мүмкіндік береді, – деді Дана Жәкенова.
– Қазіргі уақытта мұғалімдердің жүктемесі өте жоғары. Педагог тек білім беріп қана қоймай, балаларға көбірек көңіл бөліп, олармен тіл табыса білуі, креативті әрі коммуникативті болуы, сондай-ақ, қарқынды дамып жатқан жаңа технологияларды меңгеріп, оларды оқу үдерісінде кеңінен қолдануы қажет. Бұл – күн сайын табандылықпен атқарып жүрген басты міндетіміз. Президент тағайындаған мемлекеттік награда бізді одан әрі қанаттандырады, – деді Виктория Комелькова.
Жоғары наградаға ие болған «шамшырақ жағушылар» салтанатты шара соңында аймақ басшысы Бейбіт Өксікбайұлымен естелік суретке түсіп, жайдары жүзбен тарқады.
Дастанбек САДЫҚ
