Жетісу облысы полиция департаментінің Киберқылмысқа қарсы іс-қимыл басқармасының қызметкерлері облыстық прокуратура және ҰҚК департаментімен бірлесіп, Қазақстан Республикасы азаматтарының дербес деректерін заңсыз пайдаланған коллекторлық агенттіктің жолын кесті, – деп хабарлайды 7-su.kz ақпараттық порталы.
Жедел-іздестіру іс-шаралары барысында Талдықорған қаласында орналасқан коллекторлық агенттіктің қызметкерлері азаматтардың жеке мағлұматтарын қамтитын мамандандырылған ақпараттық жүйені заңсыз пайдаланып келгені анықталды. Қазіргі таңда азаматтардың жеке өміріне қол сұғылмауын және киберкеңістіктегі қауіпсіздігін қамтамасыз ету құқық қорғау органдарының басты назарында тұр.
Тергеу аясында құпия деректер базасын ұйымдастыруға және оны заңсыз мақсатта пайдалануға қатысы бар деген күдікпен үш адам ұсталды. Күдіктілердің тұрғылықты мекенжайлары мен жұмыс орындарында санкцияланған тінту амалдары жүргізілді.
Нәтижесінде дербес деректерді заңсыз сақтау, өңдеу және өзге тұлғаларға тарату үшін пайдаланылған компьютерлік техникалар мен мобильді құрылғылардың едәуір көлемі тәркіленді. Сонымен қатар, істің мән-жайын толық анықтау және тиісті тексеру шараларын жүргізу мақсатында бірнеше адам полиция органдарына жеткізілді. Қазіргі уақытта аталған дерек бойынша тергеу амалдары жүргізілуде.
