Жетісу облысында көші-қон заңнамасының сақталуын бақылауға бағытталған «Заңсыз-2026» республикалық жедел-профилактикалық іс-шарасы жалғасуда, – деп хабарлайды 7-su.kz ақпараттық порталы.
Іс-шара барысында полиция қызметкерлері көші-қон заңнамасын бұзудың 326 дерегін анықтады. Оның басым бөлігі шетел азаматтарының Қазақстан Республикасында болу тәртібін сақтамауына қатысты. Атап айтқанда, елімізде болу қағидаларын бұзғаны үшін 228 шетел азаматы әкімшілік жауапкершілікке тартылған.
Сондай-ақ шетел азаматтары мен азаматтығы жоқ адамдарды қабылдау және олардың Қазақстан аумағында болу тәртібін қамтамасыз ету жөніндегі міндеттерді орындамағаны үшін Қазақстанның 78 азаматына қатысты әкімшілік шаралар қабылданды.
Бұдан бөлек, шетелдік жұмыс күшін тарту және пайдалану қағидаларын бұзғаны үшін 20 азамат әкімшілік жауапкершілікке тартылды.
Сот шешімдерін орындау аясында 60 шетел азаматын Қазақстан Республикасының аумағынан шығарып жіберу бойынша жұмыстар ұйымдастырылды.
Сонымен қатар Қазақстан Республикасының Мемлекеттік шекарасын қасақана заңсыз кесіп өту фактісі бойынша бір қылмыстық іс тіркеліп, қазіргі уақытта сотқа дейінгі тергеп-тексеру амалдары жүргізілуде.
Жедел-профилактикалық іс-шара барысында полиция қызметкерлері шетел азаматтары болуы ықтимал нысандарда, оның ішінде құрылыс алаңдарында, базарларда, жатақханаларда, шаруа қожалықтарында және өзге де орындарда тексеру жұмыстарын жүргізуде.
Жетісу облысының полициясы өңір тұрғындары мен шетел азаматтарына көші-қон заңнамасының талаптарын сақтау міндетті екенін еске салды. Ведомство мәліметінше, бұл бағыттағы профилактикалық және бақылау шаралары алдағы уақытта да жалғасады.
