Талдықорған қаласындағы С. Сейфуллин атындағы орталық кітапханада Қазақстан Республикасы Мемлекеттік қызмет істері агенттігінің Жетісу облысы бойынша департаментінің бастамасымен және кітапхана ұжымының ұйымдастыруымен «Заң мен тәртіп» идеологиясы аясында «Парасат жолы: адалдық және әділет» атты кітап көрмесі өтті.
Іс-шараға Қазақстан Республикасы Ішкі істер министрлігінің Жетісу облысының Мамандандырылған күзет қызметі басқармасының өкілдері, сондай-ақ Қазақстан Республикасы Мемлекеттік қызмет істері агенттігінің Жетісу облысы бойынша департаментінің қызметкерлері қатысты.
Көрменің негізгі мақсаты – қоғамда адалдық, әділеттілік, заң үстемдігі және азаматтық жауапкершілік қағидаттарын дәріптеу, сыбайлас жемқорлыққа қарсы мәдениетті қалыптастыру, мемлекеттік қызметшілер мен құқық қорғау органдары қызметкерлерінің құқықтық сауаттылығын арттыру.
Көрме үш бөлім бойынша ұйымдастырылды. «Заң үстемдігі – әділетті қоғамның негізі» бөлімінде құқықтық мемлекет құру, азаматтардың құқықтары мен міндеттері, мемлекеттік қызмет этикасы және сыбайлас жемқорлыққа қарсы іс-қимыл мәселелеріне арналған әдебиеттер қойылды. Оқырмандар Қазақстан Республикасының Конституциясы, Әкімшілік рәсімдік-процестік кодексі, Еңбек кодексі, Азаматтық кодексі және сыбайлас жемқорлыққа қарсы мәдениетке арналған ғылыми-танымдық еңбектермен танысты.
«Адалдық – адамдықтың асыл қасиеті» бөлімінде ар-ождан, әділеттілік, жауапкершілік пен рухани құндылықтарды дәріптейтін шығармалар ұсынылды. Олардың қатарында Абайдың «Қара сөздері», «Құтадғу білік», «Диуани хикмет», сондай-ақ қазақ әдебиетінің таңдаулы туындылары бар.
Ал «Құқықтық мерзімді басылымдар» бөлімінде құқықтық тақырыптағы өзекті мақалалар мен салалық басылымдар көпшілік назарына ұсынылды.
Көрме барысында қатысушыларға сыбайлас жемқорлықтың алдын алу, қызметтік әдеп нормаларын сақтау, мемлекеттік қызметшілердің жауапкершілігі, мемлекеттік қызметтегі адалдық, ашықтық және заңдылық қағидаттарының маңыздылығы туралы ақпараттық материалдар таныстырылды. Сондай-ақ әрбір мемлекеттік қызметшінің сыбайлас жемқорлық көріністерінің алдын алудағы және қоғамда жемқорлыққа мүлдем төзбеушілік мәдениетін қалыптастырудағы рөліне ерекше назар аударылды.
С. Сейфуллин атындағы орталық кітапхананың бөлім меңгерушісі Лина Айдын көрменің тәрбиелік және ағартушылық маңызына тоқталды.
– Бүгінде қоғам үшін адалдық пен әділеттілік мәселелері ерекше маңызға ие. Осыған орай кітапханамызда «Парасат жолы: адалдық және әділет» атты кітап көрмесі ұйымдастырылып отыр. Көрменің басты мақсаты – оқырмандар арасында заң үстемдігі, азаматтық жауапкершілік, адамгершілік құндылықтар және сыбайлас жемқорлыққа қарсы мәдениет идеяларын насихаттау. Көрмеде құқықтық әдебиеттермен қатар адалдық, әділеттілік, ар-ұят, еңбекқорлық сияқты маңызды адами қасиеттерді дәріптейтін көркем шығармалар да ұсынылған. Кітап арқылы біз жастардың құқықтық сауаттылығын арттырып қана қоймай, олардың бойында жоғары адамгершілік қасиеттердің қалыптасуына ықпал етуді көздейміз. Көрмеде Абайдың «Қара сөздері», қазақ әдебиетінің көрнекті туындылары мен құқықтық бағыттағы еңбектер ерекше орын алады. Бұл кітаптар оқырмандарды ойлануға, өзін-өзі жетілдіруге және қоғам алдындағы жауапкершілігін сезінуге жетелейді. Көрме қонақтары заң мен құқықтық тәртіптің, адалдық пен әділеттіліктің қоғам өміріндегі мәнін тереңірек түсініп, құқықтық және рухани мәдениет саласындағы білімдерін кеңейте алады, – деді ол.
Алматы облысының және Жетісу облысының Мамандандырылған күзет қызметі басқармасының 1-полиция батальоны командирінің орынбасары, полиция капитаны Бақытжан Тұрысбеков мұндай кездесулердің маңызы зор екенін атап өтті.
– Бүгін «Парасат жолы: адалдық және әділет» атты кітап көрмесіне қатыстық. Көрме өте мазмұнды әрі тағылымды ұйымдастырылған. Мұнда ұсынылған құқықтық және рухани бағыттағы әдебиеттер адалдық, әділеттілік, жауапкершілік секілді құндылықтардың қоғамдағы маңызын терең түсінуге мүмкіндік береді. Әсіресе заң үстемдігі мен құқықтық мәдениетке арналған кітаптар біздің қызметімізбен де үндеседі. Осындай тәрбиелік мәні зор іс-шаралар азаматтардың құқықтық санасын қалыптастыруға және жастардың рухани дамуына оң әсер етеді деп есептеймін, – деді ол.
Іс-шара соңында қатысушылар сыбайлас жемқорлыққа қарсы мәдениетті дамыту, құқықтық сауаттылықты арттыру және адалдық қағидаттарын нығайту мәселелері бойынша пікір алмасты. Олар мұндай профилактикалық және ағартушылық шаралардың қоғамда заң мен тәртіп қағидаттарын орнықтырудағы маңызы зор екенін атап өтті.
Посмотреть эту публикацию в Instagram
Аяулым Шынгаева
