Үш дүркін әлем чемпионы, қазақстандық боксшы Назым Қызайбай Қытайдың Гуйян қаласында өтіп жатқан бокстан Әлем кубогының жеңімпазы атанды, – деп хабарлайды 7-su.kz ақпараттық порталы.
54 келіге дейінгі салмақ дәрежесінде сынға түскен отандасымыз финалда Италия өкілі, әлем чемпионатының екі дүркін жүлдегері Сирине Чараабимен қолғап түйістірді.
Жекпе-жек барысында Назым Қызайбай үш раунд бойы айқын басымдық танытып, төрешілер шешімімен қарсыласын 4:1 есебімен жеңді.
Финалға дейінгі жолда Назым бірнеше мықты қарсыласын жарыс жолынан шығарды. Ол 1/8 финалда Париж Олимпиадасының қола жүлдегері, оңтүстіккореялық Им Э Джиді 4:1 есебімен ұтса, ширек финалда Польша өкілі Виктория Рогалинсканы 5:0 есебімен тізе бүктірді. Ал жартылай финалда Таиланд боксшысы Натнича Чонгпронгклангты 3:2 есебімен жеңіп, финалға жолдама алған болатын.
Осылайша Назым Қызайбай Қытайдағы Әлем кубогында топ жарып, Қазақстан қоржынына кезекті алтын жүлдені салды.
