Талдықорған қаласындағы Журналистер үйінде Жетісу облысы бойынша Сауда және тұтынушылардың құқықтарын қорғау департаментінің басшысы Айдос Дауешев өңірдегі бес айдың қорытындысын жариялап, халықтың әмияны мен құқығын қорғау бағытындағы атқарылған ауқымды жұмыстарды баяндады.
Жыл басынан бері департаментке 573-тен астам өтініш келіп түскен. Аталмыш көрсеткіш халықтың құқығын қорғауға деген құлшынысы артқанын аңғартады. Мамандардың жедел әрекет етуі мен заң аясында жүргізілген жұмыстардың нәтижесінде тұтынушыларға 20 миллион теңгеден астам қаражат қайтарылды.
Департамент басшысы Айдос Нұрданұлы:
«Біздің міндетіміз – кез келген заң бұзушылыққа жедел жауап беріп, азаматтардың заңды мүдделерін қорғау. Өңір тұрғындарына жосықсыз бизнес өкілдерінің алдында өз құқықтарын қорғауға көмектесу басты назарда қала бермек. Ең көп шағым дәстүрлі түрде бөлшек сауда саласына тиесілі. Мұнда 187 арыз тіркелген. Көбіне дүкен иелері тауарды айырбастаудан немесе қайтарудан бас тартады. Әсіресе, дүкен сөрелеріндегі «Тауар қайтарылмайды және айырбасталмайды» деген заңсыз тақтайшалар әлі де кездеседі», – деп атап өтті.
Спикердің айтуынша, электронды сауда саласы да өзекті мәселенің біріне айналды. Интернет арқылы зат сатып алғанда тауар сапасының сәйкес келмеуі, жеткізу мерзімінің бұзылуы жиі орын алады. Бүгінгі таңда осы бағытта 52 өтініш қаралып, тиісті шаралар қабылданған.
Тұрғындарды тек сауда ғана емес, күнделікті тұрмыс сапасы да толғандырады. Тұрғын үй-коммуналдық шаруашылық саласы бойынша 108 арыз түскен. Сумен жабдықтаудың төмендігі, жылу мен электр энергиясына негізсіз ақы есептеу сияқты мәселелер халықтың наразылығын тудырады.
Сонымен қатар, тұрмыстық қызмет көрсету саласында да (техника жөндеу, жиһаз жасау, химиялық тазалау) 72 шағым тіркелді. Көбіне шеберлер жұмысты сапасыз орындап, ақшаны қайтарудан қашады. Мұндай жағдайда департамент мамандары заңды тетіктерді қолдана отырып, тұтынушының шығынын өндіріп алуға атсалысады.
Жаз мезгілі – демалыс уақыты. Осы кезеңде көлік қызметіне, әсіресе әуе билеттерін қайтаруға қатысты сұрақтар көбейеді. Департамент мамандары маңызды бір жайтты еске салады: егер рейс авиакомпанияның кінәсінен тоқтатылса немесе кешіктірілсе, жолаушы билет құнының 100 пайыз көлемін қайтарып алуға құқылы. Бұл ереже билеттің тарифіне қарамастан жұмыс істейді.
«Заң мен тәртіп» қағидаты бойынша департамент тек арыз қабылдап қана қоймай, нақты жазалау шараларын да іске асыруда. Бес ай ішінде 20 жоспардан тыс тексеріс жүргізіліп, 17 жағдайда заң бұзушылықтар анықталды. Нәтижесінде 25 әкімшілік хаттама толтырылып, 600 мың теңгеден астам айыппұл салынды. Сонымен қатар, азаматтардың құқығын қорғау үшін сотқа 24 талап-арыз жолданған.
Департамент басшысы сөзін қорытындылай келе:
«Бәріміз де тұтынушымыз. Біздің ортақ мақсатымыз – жазғы демалыс өңір тұрғындары мен қонақтарына тек жағымды эмоциялар сыйлауын қамтамасыз ету. Әрбір азаматтың құқығы мемлекеттің сенімді қорғауында болады», – деді.
Жосықсыз қызметке немесе сапасыз тауарға тап болсаңыз, мына мекенжайлар бойынша көмек сұрай аласыз:
- Талдықорған қаласы, Қабанбай батыр көшесі, 78.
- Жедел желі телефоны: 8 (7282) 41-56-10.
- Eotinish.kz платформасы немесе Telegram-бот.
Мәулен Әнербай
