Мемлекеттік сатып алу, оның ішінде, рәсімдердің ашықтығы, кері байланыс және халықтың сенімін арттыру, сондай-ақ, сыбайлас жемқорлыққа қарсы мәдениетті қалыптастыру мәселесі ерекше маңызға ие. Осыған байланысты облыстық мемлекеттік сатып алу басқармасы мен ҚР Мемлекеттік қызмет істері агенттігінің Жетісу облыстық департаменті дөңгелек үстел өткізді.
Жиынға мемлекеттік органдар мен кәсіпкерлер палатасының және өзге де ұйымдардың өкілдері, жеке кәсіпкерлер, қоғамдық белсенділер қатысты. Күн тәртібіндегі мәселелерге байланысты облыстық мемлекеттік сатып алу басқармасының бөлім басшысы Алмас Алимбеков, ҚР МҚІА Жетісу облыстық департаменті басшысының орынбасары Арыстан Асқардың баяндамалары тыңдалды.
Орталықтандырылған мемлекеттік сатып алудың негізгі мақсаты – сатып алу рәсімдерінің ашықтығын қамтамасыз ету, сыбайлас жемқорлық тәуекелдерін азайту, заңдылық пен адал бәсекелестік қағидаттарын сақтау, бюджет қаражатын жұмсаудың тиімділігін арттыру және мемлекеттік сатып алу саласындағы сыбайлас жемқорлық көріністерінің алдын алу.
Кездесу барысында мемлекеттік сатып алу саласы заңнамасындағы өзгерістер, рәсімдердің ашықтығын арттыру және сыбайлас жемқорлық тәуекелдерін төмендету мәселелері талқыланды.
Сала қызметкерлерінің айтуынша, ҚР Қаржы министрінің 2024 жылғы 28 тамыздағы №589 бұйрығына сәйкес Жетісу облысының Мемлекеттік сатып алу басқармасы өңірдегі мемлекеттік сатып алудың бірыңғай ұйымдастырушысы болып белгіленді. Сатып алу процедураларын орталықтандыру ашықтықты қамтамасыз етуге, адал бәсекелестікті дамытуға және бюджет қаражатын тиімді пайдалануға бағытталған.
2025 жылғы 1 қаңтардан бастап қолданысқа енгізілген жаңа «Мемлекеттік сатып алу туралы» Заң да сыбайлас жемқорлыққа қарсы тетіктерді күшейтті. Атап айтқанда, сатып алу мерзімдері қысқартылып, рәсімдер оңтайландырылды, әлеуетті өнім берушілерге қойылатын талаптар күшейтіліп, мемлекеттік сатып алуға қатысушылардың жауапкершілігі артты.
Бұрын сыбайлас жемқорлық құқықбұзушылықтарын жасаған немесе мемлекеттік шарттар бойынша міндеттемелерін тиісінше орындамаған тұлғалардың қатысуына шектеулер енгізілді. Қосалқы мердігерлерді тарту тетіктеріне бақылау күшейтіліп, мемлекеттік қаражаттың мақсатты әрі тиімді жұмсалуына басымдық берілді.
Сыбайлас жемқорлықтың алдын алуда қоғамдық бақылаудың маңызы да артып келеді. Мемлекеттік сатып алу шарттарының орындалуы туралы ақпараттың ашық жариялануы азаматтар мен бизнес өкілдерінің бақылауын күшейтіп, рәсімдердің жариялылығы мен есептілігін қамтамасыз етеді.
Қабылданып жатқан шаралар мемлекеттік сатып алу жүйесінде адал бәсекелестікті дамытуға, бюджет қаражатын тиімді пайдалануға және сыбайлас жемқорлық тәуекелдерін барынша төмендетуге бағытталған.
Айгүл БАЙБОСЫН
