Қазақстанның әйелдер арасындағы жекелей сындағы бірінші ракеткасы Елена Рыбакина «Үлкен дулыға» санатындағы Уимблдон турнирінің үшінші айналымына жолдама алды, – деп хабарлайды 7-su.kz ақпараттық порталы.
Әлемдік рейтингте екінші орында тұрған қазақстандық теннисші екінші кезеңде әлемнің 50-ракеткасы, америкалық Кэти Макналимен кездесті.
Кездесу екі сетке созылып, Рыбакинаның айқын басымдығымен аяқталды – 6:1, 6:2.
Теннисшілер кортта 1 сағат 11 минут өткізді. Осы уақыт ішінде Елена бір эйс жасап, үш қос қателікке жол берді. Сонымен қатар, ол 10 брейк-пойнттың төртеуін сәтті пайдаланып, сенімді ойын өрнегін көрсетті.
Осылайша, Елена Рыбакина Уимблдон турниріндегі қатарынан екінші жеңісіне қол жеткізіп, үшінші айналымға өтті.
Келесі кезеңде қазақстандық теннисші әлемнің 25-ракеткасы, бельгиялық Элизе Мертенспен кездеседі.
