Футболдан ел чемпионатының екінші айналымы басталды. «Жетісу» футбол клубы 16-турда Ақтөбедегі «Қобыланды батыр» алаңында жергілікті командамен ойнап, 1:2 есебімен жеңілді. Оның алдында Талдықорғанда өткен 15-турда «Ақтөбені» 1:0 нәтижесімен жеңген болатын. Жетісулықтар сапынан қатарынан екі матчта гол салған – Асхат Балтабеков.
Ойын тартысқа толы өтті. «Ақтөбе» өткен кездесуде кеткен есесін қайтару мақсатында шабуылды жиілетіп, допты барынша бақылауда ұстап, соққыны көбейтті. Статистикаға үңілсек – «Ақтөбе» 59 пайыз, ал «Жетісу» 41 пайыз допқа иелік етті. Соққылар саны бойынша «Ақтөбе» алда (13 соққы, 6 тура; «Жетісуда» 5 соққы, 2 тура). Бұрыштама бойынша ақтөбеліктердің нәтижесі жақсы (9 рет). Талдықорғандықтар болса жалпы ойын барысында тек 1 мәрте ғана бұрыштан допты көтеру құқығына ие болды.
Өткен ойында 5 ескерту қағазы көрсетілді (15-турда). Бесеуінде жетісулықтар алды. Ал осы ойында (16 тур) 4 сары қағаз ақтөбеліктерге, 2 ескерту жетісулықтарға берілді. Георги Заряны құлатып, екінші ескерту қағазын алған Дінмұхамед Қашкен 90 минутта алаңнан кетті.
Матчта есепті ашқан – Иван Ордец. Ол 45+1 миунтта Луиш Нанидың бұрыштан көтерген добына бірінші жетіп, допты басымен Стефан Сикаш қорғаған қақпаға бағыттады. Ал одан кейінгі голды 86 минутта көрдік. «Жетісу» командасының сол қапталдағы қорғаушысы Асхат Балтабеков пенальтиден гол салды. Бұл 32 жастағы жетісулықтың чемпионатта салған үшінші голы (16 ойында 3 гол салып, 5 пас берді). Пенальтиді Шыңғыс Әнуарбековке айып алаңының ішінде дөрекі ойнаған Темірлан Ерлановтың әректі үшін берді. Ойын аяқталар тұста «Жетісу» қақпасының алдындағы абыр-сабыр сәтте Артур Шушеначевпен доп үшін арпалысқан Йован Пайовичтің қолына тиіп кетті деп есептеген оралдық бас төреші Болат Сариев бірден пенальти белгіледі. Айтабанға келген Георги Заря мүлт кеткен жоқ. Есеп – 1:2. Ойын соңындағы баспасөз мәслихатына «Жетісу» футбол клубының бас бапкері Қайрат Нұрдәулетов келмеді.
Ойыннан кейін жанкүйерлердің пікірі екіге қақ айырылды. Инстаграмдағы танымал goal.kz_official, pflkaz, match.kz_ парақшаларындағы ойын жөніндегі арнайы жазбада жазылған пікірлердің басым бөлігі кездесу соңындағы пенальтидің өте күмәнді екенін алға тартқан. Төрешіні жазғырып жатқандарда жоқ емес. Қазының екі таймда да қосымша уақытты «аямай» қосқанын сынағандар бар.
Талдықорғандықтар турнирлік кестеде 16 ойыннан кейін (4 жеңіс, 6 тең, 6 жеңіліс) 18 ұпаймен 8-орында келеді. «Жетісу» келесі ойынын өз алаңында 11 шілдеде «Алтайға» (Өскемен) қарсы өткізеді.
Серік ҚАНТАЙ
