Қазақстанда 2027 жылдың 1 қаңтарынан бастап зейнетақы жинақтарының сақталуына берілетін мемлекеттік кепілдікті жүзеге асыру механизмі жаңартылады, – деп хабарлайды 7-su.kz ақпараттық порталы.
Бұл ретте ұсынылып отырған өзгерістер мемлекет тарапынан БЖЗҚ-дағы зейнетақы жарналарының сақталуын қамтамасыз етуден мүлдем бас тартуды білдірмейді. Қазіргі қолданыстағы тәртіп бойынша азамат зейнетақы төлемдерін алуға құқылы болған сәтте оның БЖЗҚ-ға нақты аударған зейнетақы жарналарының сомасы инфляция деңгейі ескеріле отырып есептеледі. Егер осы сома мен БЖЗҚ-дағы нақты жинақталған қаражат арасында айырмашылық орын алса, ол айырма республикалық бюджет есебінен өтеліп келеді.
Келер жылдың 1 қаңтарынан бастап бұл механизм жаңа сипат алады. Қазақстан Республикасының Әлеуметтік кодексінің 217-бабына сәйкес мемлекет БЖЗҚ-ға нақты аударылған зейнетақы жарналарының бастапқы мөлшерде сақталуына толық кепілдік береді.
Еңбек және халықты әлеуметтік қорғау министрлігі түсіндіргендей, бұған дейін азаматтардың өз зейнетақы жинақтарының қалай инвестицияланатынына тікелей ықпал етіп, басқару мүмкіндігі шектеулі еді. Инвестициялық саясатты мемлекеттің өзі айқындап келгендіктен, инвестициядан түскен кіріс инфляция деңгейінен төмен болған жағдайда туындайтын айырманы өтеу міндетін мемлекет өз мойнына алған болатын.
Қазіргі уақытта салымшылардың өз зейнетақы жинақтарын басқаратын жеке компанияны және инвестициялау стратегиясын өз бетінше таңдау мүмкіндігі айтарлықтай кеңейіп келеді. Осыған байланысты мемлекеттік кепілдікті бұрынғы тәртіппен қолданудың бастапқы негізі өзінің алғашқы мәнін өзгертті.
Алайда зейнетақы активтерін басқару жүйесі мемлекеттік бақылауда қала береді. Қазақстан Республикасының Президенті басқаратын Ұлттық қорды басқару жөніндегі кеңес инвестициялық саясаттың негізгі бағыттарын айқындайды, активтерді басқарудың тиімділігін арттыру жөніндегі ұсыныстарды қарайды және инвестициялау нәтижелері туралы есептерді тыңдайды. Ал Ұлттық Банк зейнетақы активтерін инвестициялауға рұқсат етілген қаржы құралдарының тізімін қалыптастырса, Үкімет инвестициялық саясаттың тиісті тәсілдері мен негізгі параметрлерін бекітеді.
Жинақтарды сақтау реформасы азаматтардың қаржылық сауаттылығын арттырып, өз қаражатын тиімді басқаруға жол ашады. Билік осы арқылы еліміздің инвестициялық нарығында бәсекелестікті арттыруды көздейді. Біріншіден, салымшыларға жеке жеке инвестициялық компаниялардың жұмыс нәтижесін салыстырып, ең жоғары табыстылық көрсететін басқарушыны таңдау құқығы беріледі. Екіншіден, мемлекеттік бақылаудың сақталуы халықтың базалық жарналарының қауіпсіздігін толық қамтамасыз етеді.
