Ұлттық банк «7-20-25» ипотекалық тұрғын үй бағдарламасының талаптарына бірқатар маңызды өзгерістер енгізді. Енді баспана сатып алушылар үшін үйдің ең жоғары құны артты, ал қарыз алушыларға төлем қабілетін растау кезінде кепілгер тартуға мүмкіндік берілді, деп хабарлайды 7-su.kz ақпараттық поратлы.
2025 жылғы 26 қыркүйектегі қаулыға сәйкес, Астана, Алматы, Шымкент, сондай-ақ Ақтау мен Атырау қалаларында тұрғын үйдің ең жоғары бағасы 25 миллион теңгеден 30 миллион теңгеге дейін көтерілді. Қарағандыда бұл көрсеткіш 20 миллионнан 25 миллион теңгеге дейін, ал басқа өңірлерде – 15 миллионнан 20 миллион теңгеге дейін ұлғайтылды.
Бағдарлама қатысушылары енді төлем қабілетін растау үшін қосалқы қарыз алушымен қатар кепілгерді (гарантты) де тарта алады. Сонымен қатар, өтінім беру кезінде қарыз алушының тұрақты табысы басты назарда болады.
Бағдарламаның негізгі шарттары өзгеріссіз қалды: бастапқы жарна – 20%, несие мөлшерлемесі – жылдық 7%, несиелеу мерзімі – 25 жылға дейін. Бағдарламаға тек жұмыс істейтін азаматтар қатыса алады. Қатысушылардың соңғы 18 айда атына тұрғын үй тіркелмеуі керек және бағдарлама арқылы үй алғандар қайта қатыса алмайды.
Бағдарламаға РБК, ForteBank, Altyn Bank, Halyk Bank, Freedom Bank, Еуразиялық банк және Банк ЦентрКредит сияқты ірі қаржы ұйымдары қатысады.
Ұлттық банк бұл өзгерістер ипотеканы қолжетімді етіп, азаматтардың тұрғын үй жағдайын жақсартуға серпін береді деп сенеді.
Анықтама үшін: «7-20-25» бағдарламасы 2018 жылдан бері жүзеге асып келеді және 2029 жылға дейін жалғасады. 2025 жылғы 2 қазанға дейін бағдарлама аясында 1 149,7 миллиард теңгеге 81 886 жеңілдетілген қарыз берілген.
