Талдықорған қаласы Ілияс Жансүгіров атындағы Мәдениет сарайында «Әкелер одағы» қоғамдық бірлестігінің облыстық филиалы ұйымдастырған «Әке. Отбасы. Болашақ» XI республикалық әкелер форумы өтті. Тағылымды басқосудың басты мақсаты – отбасы институтын нығайту, әкенің ұрпақ тәрбиесіндегі айрықша орнын айқындау, ұлттық құндылықтарды ұлықтау, жауапты әкелік мәдениетін қалыптастыру және өнегелі әкелердің өмірлік тәжірибесін кеңінен дәріптеу.
Республикалық жиынға ҚР Парламенті Сенатының депутаты Ғалиасқар Сарыбаев, ҚР Парламенті Мәжілісінің депутаты Болат Керімбек, облыс әкімінің орынбасары Диас Есдәулетов, «Ұлттық құндылықтар академиясы» республикалық қоғамдық бірлестігінің төрағасы Әділхан Дүйсебек, «Сен қалаған әке» кітабының авторы Баян Бекетай, сондай-ақ еліміздің түкпір-түкпірінен келген «Әкелер одағының» өкілдері, қоғам қайраткерлері, мемлекеттік мекемелер мен үкіметтік емес ұйымдардың мүшелері және белсенді әкелер қатысты. Дәстүрлі форумға жалпы саны 400-ге жуық азамат жиналды.
Жиында сөз алған Жетісу облысы әкімінің орынбасары Диас Есдәулетов отбасы құндылықтарын сақтау – елдің ертеңіне салынған ең қымбат инвестиция екенін айтты. Оның айтуынша, Мемлекет басшысы Қасым-Жомарт Тоқаев әділетті әрі жауапты қоғам қалыптастыру жолында отбасының орнына тұрақты түрде айрықша назар аударып келеді.
– Қазақ дүниетанымында әке – тәрбиеші, бағыт беруші, ұлттық мұраттың жалғастырушысы. Еңбекқорлық, адалдық, жауапкершілік пен Отанға сүйіспеншілік алдымен шаңырақта қалыптасады. Сондықтан әке абыройы қоғамның беріктігін айқындайтын маңызды өлшем. Жетісу өңірінде осы бағыттағы жұмыстар жүйелі жалғасып келеді. Әкелер кеңестері, білім беру ұйымдары мен қоғамдық институттар жас ұрпақ тәрбиесіне арналған бастамаларды бірлесіп жүзеге асыруда, – деді ол.
Облыстық «Әкелер одағы» қоғамдық бірлестігінің төрағасы Арыстанғали Арын ұлттық тәрбиені сақтау – бүгінгі күннің басты міндеттерінің бірі екенін жеткізді.
– Біз бұл форумға ұлттың ертеңін талқылау үшін жиналдық. Әр баланың тағдыры – отбасынан, әр шаңырақтың берекесі – әкенің парасатынан бастау алады. Ақпараттық ықпал күшейген кезеңде балаға кәсіп қана үйрету аздық етеді. Ең алдымен адамдық қасиет пен азаматтық жауапкершілікті бойына сіңіру қажет. Сол жолда әке ақылшы, сырлас әрі өмірлік бағыт беретін тұлғаға айналуға тиіс, – деді Арыстанғали Қадырұлы.
Оның айтуынша, соңғы екі жыл ішінде аймақта әкелік мәдениетті нығайту бағытында ауқымды жұмыстар атқарылған. Бүгінде өңірдің барлық аудан-қалаларындағы мектептерде Әкелер кеңестері құрылып, нәтижелі қызмет жүргізуде. Жүздеген тәрбиелік кездесу, тағылымды басқосулар мен түрлі жобалар ұйымдастырылған. Қаратал және Панфилов аудандарында өткен «Әке және отбасы» форумдары тұрғындардың зор қолдауына ие болып, жауапты әкелік мәдениетін дамытуға тың серпін берген.
Сондай-ақ жиында «Ұлттық құндылықтар академиясы» республикалық қоғамдық бірлестігінің төрағасы Әділхан Дүйсебек ұлттық тәрбиенің бастауы отбасынан өрбитінін атап өтті.
– Балаға қалатын ең асыл мұра – сапалы тәрбие. Оның өзегі ұлттық құндылықтардан нәр алады. Әке мен ананың өнегесі ұрпақтың болмысын қалыптастырады. Сондықтан әрбір шаңырақ ұлттық рухтың, салт-дәстүрдің және адамгершілік қағидаттарының алтын бесігі болуы керек, – деді ол.
Форумда актер әрі блогер Ринат Дошыбеков те сөз алып, мұндай кездесулердің қоғамдық маңызына тоқталды.
– Әке институтын дамыту – тұтас қоғамның ортақ жауапкершілігі. Бүгінгі форум еліміздің әр өңірінен келген азаматтардың тәжірибе алмасуына, ортақ құндылықтарды дәріптеуіне және жауапты әкелік мәдениетін нығайтуына зор мүмкіндік берді. Осындай игі бастамалар ұрпақ тәрбиесін күшейтіп, отбасы құндылықтарын бекемдей түседі, – деді ол.
Форум барысында көтерілген ойлар мен ұсыныстар отбасы институтын одан әрі нығайтуға, әке мәртебесін биіктетуге және ұлттық тәрбиенің сабақтастығын сақтауға бағытталған маңызды бастамалардың бірі ретінде көпшілік тарапынан жоғары бағаланды.
Гүлжан ТҰРСЫН
