Б. Құранбек атындағы Журналистер үйінде әлеуметтік маңызы бар азық-түлік тауарларының бағасын тұрақтандыру бағытындағы жұмыстарға арналған баспасөз мәслихаты өтті. Басқосуға Жетісу облысы кәсіпкерлік және индустриялық-инновациялық даму басқармасы басшысының орынбасары Мақсат Саданов пен «Жетісу» ӘКК» өңірлік инвестициялық орталығы» АҚ басқарма төрағасының бірінші орынбасары Альмира Ибраимова қатысты.
Жиында өңірде баға тұрақтылығын қамтамасыз етудің екі негізгі механизмі жүйелі іске қосылғаны айтылды. Атап айтқанда, тұрақтандыру қорын қалыптастыру және «айналым схемасы» арқылы тауар өндірушілерді жеңілдетілген несиемен қамту. Бұл бағыттарға облыстық бюджеттен 3 млрд. 801 млн теңге бөлінген.
Тұрақтандыру қоры бүгінде 1 млрд 353 млн теңгеге бағаланатын 1919 тонна өніммен жасақталған. Қор құрамында 10 түрлі әлеуметтік маңызы бар азық-түлік бар. Соның ішінде Көксу қант зауыты өндірген 904 тонна қант (435 тг/кг), 56 тонна макарон (310 тг), Балқаш ауданындағы «Агрофирма «Бірлік» кәсіпорнының 188 тонна күріші (273 тг/кг), «Алель Агро» компаниясының 372 тонна құс еті (1245 тг/кг), 14 тонна ас тұзы (65 тг/кг) қамтылған.
Сондай-ақ, Сарқан ауданындағы «Акбулак Продукт» ЖШС сүт зауыты төрт түрлі өнім бойынша бағаны тұрақтандыру міндеттемесін алған. Қазіргі таңда 105 тонна сүт өнімдері жеткізіліп, сүт – 345 теңгеден, айран – 365 теңгеден, сары май – 4300 теңгеден, сүзбе – 1500 теңгеден аспайтын құнмен саудаға шығарылуда. Бұдан бөлек, «PCD Group» зауыты өндірген «Sarqan» маркалы 280 мың литр күнбағыс майы әлеуметтік дүкендерде 680 теңгеден сатылуда.
Брифинг барысында Альмира Ибраимова екінші бағыт – «айналым схемасына» кеңірек тоқталды.
– Бұл тетік арқылы тауар өндірушілерге жылдық 0,01 пайыздық мөлшерлемемен жеңілдетілген несие беріледі. Кәсіпкерлер өз кезегінде әлеуметтік маңызы бар өнімдерді келісілген көлемде және белгіленген бағамен кемінде бір жыл бойы жеткізуді міндетіне алады. Нәтижесінде баға тұрақтылығы сақталып қана қоймай, жергілікті өндіріс те қолдау табады, – деді ол.
Аталған схема аясында бүгінде 8 тауар өндірушіге 2 млрд теңге бөлінген. Солардың бірі – Талдықорғандағы «Sardar Export» нан комбинаты. Кәсіпорын әлеуметтік нанды 110 теңгеден 125-тен астам дүкенге жеткізіп отыр. Сонымен қатар, бөлінген қаражат есебінен 1080 тонна бірінші сұрыпты ұн өндірілген.
Жұмыртқа өндірісі бағытында «Көгер ЛТД» құс фабрикасы бірінші санаттағы өнімді 49 теңгеден ұсынып келеді. Қазіргі таңда өңірде 4,5 млн дана жұмыртқа қоры қалыптасқан. Бұл өнімдер 49 сауда нүктесі арқылы тұрғындарға қолжетімді.
Көкөніс бағасын тұрақтандыру үшін Көксу, Кербұлақ, Ескелді және Панфилов аудандарындағы шаруашылықтарға қолдау көрсетілген. Нәтижесінде 3900 тонна картоп, 795 тонна сәбіз, 623 тонна пияз қоры жасақталып, олар белгіленген шекті бағамен сатылуда. Сондай-ақ маусымаралық кезеңге Түркістан облысының шаруашылығымен 1184 тонна ерте пісетін көкөніс жеткізуге келісім жасалған. Өнімдер Талдықорған қаласындағы жаңғыртылған көкөніс сақтау қоймасында сақталады.
Ет өнімдері бойынша да нақты шаралар қабылданған. Алакөл ауданы мен Талдықорған қаласындағы екі бордақылау алаңына жеңілдетілген несие беріліп, жалпы көлемі 416 тонна сиыр еті 3300 теңгеден аспайтын бағамен ұсынылуда.
Әлеуметтік маңызы бар азық-түлік тауарлары «Жетісу» ӘКК-нің әлеуметтік дүкендері мен серіктес сауда нүктелері арқылы сауда үстемесінсіз сатылуда. Қазіргі таңда Талдықорғанда 3 әлеуметтік дүкен және 8 серіктес нысан жұмыс істейді. Жалпы, бұл жүйе арқылы ұсынылатын өнімдер нарықтағы бағадан орта есеппен 10-15 пайызға төмен.
Жауапты мекемелер тарапынан баға тұрақтылығын сақтау бағытында тұрақты мониторинг жүргізіліп, сауда субъектілерінің үстемеақы шегін сақтауына бақылау күшейтілген.
Санжар СҰЛТАНҒАЗЫ
