Алматы облысының «Жасыл ел» жастар еңбек жасағы 2020 жылы «Jyl serpini» номинациясын иеленіп, үздіктер қатарына көрінген болатын. Биыл да штаб ХVІI маусымдық еңбек жұмысын шілде айынан бастап, 944 жасты жұмыспен қамтып отыр. Сонымен қатар, облыста студенттік құрылыс отрядтарының жұмысы қайта жанданды. Бұл туралвы «Жетісу» газеті Алматы облысы әкімінің баспасөз қызметіне сілтеме жасап хабарлады.
Облыстық жастар саясаты мәселелері жөніндегі басқарманың мәліметіне қарағанда «Жасыл ел» құрамында ЖОО-ның (жоғары оқу орнының) 217 студенті, кәсіптік техникалық білім беру орталықтарының 304 студенті, 245 мектеп оқушысы, 178 жұмыссыз жас бар. 2021 жылы штабы жұмысына бюджеттен 151,6 млн.теңгеге жуық қаржы бөлінген.
Өткен бір ай ішінде облыс бойынша жастар «Жасыл бақ – таза қала», «Таза өзен – таза жағалау», «Жайқалсын жас терек», «Экодесант» акцияларын өткізіп, экологиялық тазарту шаралар атқарса, «Армысың, Ардагер», «Үлкенге құрмет – кішіге міндет» атты қамқорлық акциялары кезінде қарттарға жәдем көрсетті.
Жалпы, шілде айында жастардың қатысуымен облыс бойынша 156 км арық аршылып, 301 га жердің шөбі шабылған, 176 га жер қоқыстан тазартылды. Сонымен бірге, студенттік құрылыс жасақтарының қызметі қайта жандана бастады. Бүгінгі күні облыс көлеміндегі құрылыс жұмыстарында осындай отряд құрамындағы 211 жас жұмыс істеп жүр.
«ЖЕТІСУ-АҚПАРАТ»
