Аймақта халықты сапалы ауызсумен қамтамасыз ету бағытында жүйелі жұмыстар жүргізілуде.
Нәтижесінде көптеген елді мекен таза ауызсуға қол жеткізіп, тұрғындардың өмір сүру сапасы артып келеді. Бұл – халық денсаулығы мен тұрмысын жақсартуға бағытталған маңызды қадам. Осындай игілікті істі жүзеге асырып отырған елді мекеннің бірі Ескелді ауданына қарасты Ақтұма ауылы. Бұған дейін ауыл халқы құдық суын пайдаланып келген. Енді бұл мәселе де өз шешімін тауып, ел қуанышын еселетіп отыр.
– Бұрын суды құдықтан тасып алатынбыз. Қыста да, жазда да қиындық көп болды. Енді үйімізге таза ауызсу келіп, тұрмысымыз жеңілдеп қалды. Балаларымыз да таза су ішіп отыр. Бұл – ауыл халқы үшін үлкен қуаныш. Осындай игі іске себеп болған азаматтарға алғысымыз шексіз, – дейді ауыл тұрғыны Ақмарал Немелбаева.
Ескелді ауданының тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімінің басшысы Әлібек Әділбаевтың айтуынша, Ақын Сара ауылдық округіне қарасты Ақтұма ауылы тұрғындарын орталықтандырылған ауызсумен қамту мақсатында жоба дайындалып, 2021 жылы «Монолит» ЖШС мердігер компаниясымен келісімшарт жасалған. Бірақ, олар бұл істі аяқсыз қалдырыпты. Сөйтіп, олармен сот ісі жүрген. Кейіннен жоба қайта түзетіліп, аяқсыз қалған істің тамырына қан жүгірген. Облыс әкімінің қолдауымен былтыр бюджеттен қаражат бөлініп, жаңа мердігер компаниямен келісімшарт жасалған. Нәтижесінде өткен жылғы қараша айында жұмыс толық аяқталып, ауыл халқы таза ауызсуға қол жеткізген. Жоба аясында ауыл көшелеріне су құбырлары тартылып, әр үйге арнайы су жүйесі орнатылған. Қазіргі таңда тұрғындар таза суды үйлерінен пайдаланып отыр.
Мамандардың айтуынша, ауызсудың сапасы санитарлық талаптарға сай келеді. Сондықтан бұл жоба тұрғындардың денсаулығын сақтауға да үлкен үлес қосады. Халық игілігі үшін атқарылып жатқан мұндай жұмыстар алдағы уақытта да жалғасын табады. Таза ауызсумен қамту – ел дамуының және халыққа деген қамқорлықтың айқын көрінісі.
Айта кетейік, Ақтұма ауылындағы сумен жабдықтау жүйесін қайта жаңғырту және салу жұмыстарымен «Темірқазық-стройпроект» ЖШС айналысты. Тартылған желілердің ұзындығы 1,6 шақырым. Жоба құны – 80,5 миллион теңгені құрайды. Аталған ауылдың бүгінде 108 тұрғыны орталықтандырылған суға қол жеткізіп отыр. Сонымен бірге, биыл Сырымбет ауылындағы сумен жабдықтау жүйесі қайта жаңғыртылып, жұмыстар толық аяқталған. Бұл істерді де «Темірқазық-стройпроект» ЖШС жүзеге асырды. Тартылған желілердің ұзындығы 1,6 шақырым, жоба құны – 178,5 миллион теңге. Нәтижесінде ауылдың 1787 тұрғыны орталықтандырылған суды тұтынуда.
А. БАЙЖҰМАҚЫЗЫ
