Қазақстанда протездік-ортопедиялық көмекке мұқтаж балаларға медициналық көрсетілімдеріне сәйкес жеке өлшеммен жасалған протездік-ортопедиялық бұйымдар тегін берілуде, – деп хабарлайды 7-su.kz ақпараттық порталы.
Еліміздің әлеуметтік қорғау жүйесіндегі маңызды бағыттардың бірі саналатын қамқорлық шаралары ҚР Еңбек және халықты әлеуметтік қорғау министрлігінің Әлеуметтік қорғау саласын дамытудың ұлттық ғылыми орталығы базасында жүзеге асырылады. Тірек-қимыл жүйесінде бұзылыстары бар бүлдіршіндердің қозғалысын қолдау, дене бөліктерінің қызметін түзету және оңалтудың нәтижесін жақсарту мақсатында әр балаға жеке тәсіл қолданылады. Арнайы бұйымдар баланың денсаулығына, дене бітімінің ерекшеліктеріне және нақты қажеттілігіне сай жеке өлшемі бойынша дайындалады.
Көмектің негізгі түрлерінің бірі ортездеу процесін қамтиды. Ортез – дененің белгілі бір бөлігін ұстап тұруға, тұрақтандыруға, дұрыс қалыпқа келтіруге және денеге түсетін салмақты азайтуға көмектесетін медициналық бұйым. Мамандардың тексеру нәтижесіне қарай табанға, тобыққа, тізе буынына, балтырға, аяқтың толық бөлігіне, сондай-ақ қолдарға арналған құралдар әзірленеді. Бала өскен сайын оның дене бітімі мен қозғалыс қажеттілігі де өзгеретіндіктен, дайын бұйымды бере салуға болмайды. Міндетті түрде кәсіби маманның тексеруінен өтіп, жеке өлшемдер алу қажет.
Әлеуметтік қолдау жүйесі тек бұйымды тегін дайындаумен шектелмейді. Егер протездік-ортопедиялық көмек алу үшін басқа елді мекенге бару қажет болса, жол шығындарын өтеу тетігі қарастырылған. Негізгі жол шығындары жылына 1-2 рет өтеледі. Оның ішінде ірі бұйымдарға екі ретке дейін, ал ұсақ құралдарды алу кезінде жол шығыны бір рет қайтарылады. Сонымен бірге баланы алып барған ілеспе тұлғаның да жол шығыны бір рет өтелуге тиіс. Осылайша, мемлекеттік көмек кеңес алудан бастап, өлшем дайындау, бұйымды беру және жол шығынын өтеуді толық қамтиды.
Еңбек және халықты әлеуметтік қорғау министрлігі ата-аналарға бұйымды өз бетінше таңдамай, алдымен кәсіби дәрігерге жүгінуге кеңес береді. Маман баланың қозғалу мүмкіндігін бағалап, қажетті құрал түрін дұрыс анықтайды. Сапалы дайындалған ортез баланың еркін қозғалуына, күнделікті өмірде өздігінен әрекет етуіне және оңалту нәтижелерін жақсартуға жол ашады. Мұндай қолдау отбасыларға қосымша қаржылық салмақ салмай, баланың денсаулығын нығайтуға мүмкіндік береді.
