Талдықорған қаласындағы жағажайда 1 маусым – Халықаралық балаларды қорғау күніне арналған «Балалық шақ – бақыт мекені» атты ауқымды салтанатты іс-шара өтті. Балалардың шат күлкісі мен қуанышы сән берген мерекеге мыңдаған қала тұрғыны, ата-аналар мен бүлдіршіндер қатысты.
Саябақ алқабы ерекше безендіріліп, келушілерге сан түрлі қызықты локация ұсынылды. Жағажай аумағында тақырыптық фотозоналар мен сауда жәрмеңкелері ұйымдастырылса, саябақтағы арнайы алаңдарда робототехника, авиа және кеме модельдеу көрмелері қойылып, жас өнертапқыштардың туындылары көпшілік назарына ұсынылды. «Заң және Тәртіп» алаңы, спорттық ойындар, велосипед жарысы, суретшілер пленэрі, асфальтқа сурет салу байқауы, ертегілер әлемі мен қуыршақ театры балалардың қызығушылығын арттырған ерекше орындарға айналды.
Салтанатты шараға жиналған қауымды қала әкімі Ернат Бәзіл құттықтап, балалардың жарқын болашағы үшін мемлекет тарапынан жасалып жатқан қолдаулар мен мүмкіндіктерге тоқталды. Сондай-ақ, «AMANAT» партиясының облыстық филиалының төрағасы Арыстанғали Арын да бүлдіршіндерге ізгі тілегін арнап, олардың амандығы мен бақытты балалық шағы әрқашан қоғам назарында екенін атап өтті.
Мерекелік бағдарламаның жалғасы ретінде Талдықорған қаласы Оқушылар сарайының тәрбиеленушілері концерттік қойылымдарын ұсынды. Концерт «Қымыз мұрындық» биімен ашылып, көрермендерді ұлттық өнердің әсем өрнегімен қарсы алды.
Сахна төрінде балалар шығармашылығының сан қыры көрініс тапты. «Балалық шақ», «Самалтау», «Тек алға!», «Қазақстан», «Мен қазақпын», «Бақыт деген…» сынды әндер орындалып, көрермендердің ыстық ықыласына бөленді. Ал «Көркем», «Кербез», «Цветы», «Танцевальная мозаика», «Құс базары», «Stars», «Томирис», «Contemporary» және басқа да хореографиялық композициялар мерекенің сәнін кіргізді.
Бұл күн бүлдіршіндерге көтеріңкі көңіл-күй сыйлап қана қоймай, олардың шығармашылық қабілеттерін дамытуға, достық пен мейірімділікті дәріптеуге бағытталған тағылымды мерекеге ұласты. Балалардың бақытты балалық шағы мен жарқын келешегі жолындағы мұндай игі бастамалар әрдайым жалғасын таба бермек.
Медет ЖҰМАБАЙ
