«Болашақ» бағдарламасы бойынша шәкіртақы көлемін 10-15% арттыру жоспарланып отыр. Бұл туралы Халықаралық бағдарламалар орталығы төрағасының орынбасары Абай Рахмет үкіметтік баспасөз мәслихатында мәлімдеді, – деп хабарлайды 7-su.kz ақпараттық порталы.
– Шәкіртақы 15 жылдан астам уақыт бойы өсірілген жоқ. Бірақ инфляция бүкіл әлемде өсіп келеді және біз стипендиаттарымыздың кейде тіпті отбасыларымен кетіп жатқанын көріп отырмыз. Ал кейбір елдерде шәкіртақы жетпейді, – деді Абай Рахмет.
Оның айтуынша, соңғы жылдары шәкіртақы мөлшері айтарлықтай өзгермеген, сондықтан оны қайта қарау мәселесі күн тәртібіне шығарылған. Қазіргі таңда тиісті есептеулер жүргізіліп жатыр, ал түпкілікті шешім келесі жылы қабылдануы мүмкін.
– Шәкіртақы мөлшері ел мен қалаға байланысты өзгереді. Мысалы, Нью-Йоркте ол жоғары – шамамен 2200 доллар. Басқа штаттарда төмен. Бір нұсқа – шәкіртақыға орын санын азайту және үнемделген қаражатты оқып жатқан студенттердің шәкіртақысын көбейтуге пайдалану, – деді Халықаралық бағдарламалар орталығы төрағасының орынбасары
Жоспарға сәйкес, шәкіртақы орта есеппен 10-15 пайызға ұлғайтылмақ. Дегенмен, кейбір елдер мен оқу қалалары бойынша өмір сүру құнына байланысты өсім бұдан да жоғары болуы ықтимал.
Мамандардың пікірінше, бұл қадам бағдарламаның бәсекеге қабілеттілігін сақтап, шетелде білім алып жатқан қазақстандық студенттердің әлеуметтік жағдайын жақсартуға бағытталған.
