Алматы қаласында Қазақстанның Х Азаматтық форумының «Қоғам мен мемлекеттің тұрақты даму мүддесіндегі әріптестікке 30 жыл» пленарлық отырысы өтті. Шараға ҚР Ақпарат және қоғамдық даму министрі Аида Балаева, ҚР Президенті Әкімшілігі Басшысының бірінші орынбасары Дәурен Абаев, Қазақстанның Азаматтық Альянсының президенті Бану Нұрғазиева қатысты.
Республиканың өзге аймақтары онлайн режимінде қатысқан жиында Мемлекет басшысы Қасым-Жомарт Тоқаевтың форумға арналған құттықтауын Дәурен Әскербекұлы оқып берді. Форумның пленарлық отырысында ауылдағы азаматтық бастамаларды дамыту, адам құқықтары мен бостандықтарын қорғау, халықаралық ынтымақтастық, азаматтық қоғам, экология және инклюзия мәселелері қаралды.
Қасым-Жомарт Кемелұлы Жолдауында ауылдық жерлердегі азаматтық бастамаларды қолдаудың тиімді тәсілдерін әзірлеуді тапсырған болатын. Отырыс модераторы, ҚР Ақпарат және қоғамдық даму министрі Аида Балаева халқының 47%-ы ауылда өмір сүретін мемлекет үшін бұл бастаманың стратегиялық маңызы зор екендігін атап өтті. Ауылдағы азаматтық белсенділікті дамыту туралы «Қатонқарағай ауданының тұрақты дамуы» қоғамдық қорының директоры Серік Жүнісов баяндады. Ал «Сана-Сезім» әйелдер бастамалары құқықтық орталығының жетекшісі Шахноз Хасанова адам құқықтарын қамтамасыз ету бойынша пікір білдіріп, балалар мен аналардың, қарттардың, ерекше қажеттіліктері бар адамдардың, құл саудасы құрбандарының құқықтары мен мүдделерін, сондай-ақ, азаматтардың саяси және әлеуметтік құқықтарын қамтамасыз ету мәселелерін сөз етті.
Биылғы 10 маусымда Президенттің «Адам құқықтары саласындағы бірінші кезектегі шаралар жоспарына» қол қойғанын еске салған Аида Ғалымқызы: «Бұл мемлекет пен Президенттің қазақстандықтардың құқықтары мен бостандықтарын қорғауды қамтамасыз ету саласындағы елеулі өзгерістерге дайын екендігін көрсетеді», – деді.
Азаматтық қоғамды дамыту қауымдастығының атқарушы директоры Жәмилә Асанова халықаралық миссиялардың азаматтық бастамаларды дамытуға қосқан үлесіне тоқталды. Осыған байланысты Еуропадағы қауіпсіздік және ынтымақтастық ұйымының аз ұлттар істері жөніндегі Жоғарғы комиссары Қайрат Әбдірахмановтың арнайы құттықтау хаты оқылды. Сонымен қатар, Біріккен Ұлттар Ұйымы Бас хатшысының кеңесшісі Мирьяна Сполярич Эггер форум делегаттарын бейнеүзік арқылы құттықтады.
Азаматтық форумның пленарлық отырысын қорытындылаған Қазақстанның Азаматтық Альянсының президенті Бану Нұрғазиева азаматтық қоғамның қазіргі жағдайы, жетістіктері мен одан әрі дамыту тәсілдері туралы ойын білдірді. Одан кейін дәстүрлі «ҮЕҰ-ға арналған сыйлығы» салтанатты түрде табыс етілді. Сонымен қатар, алғаш рет 15 номинация бойынша 10 жылдан астам жұмыс тәжірибесі бар ҮЕҰ арасында «Таңдау» сыйлығы табысталды.
Алматы облысынан қатысқан Талдықорған аймақтық әйелдерді қолдау орталығының президенті Жанар Нұрмұханова, «Әлеуметтік проблемаларды шешудегі ақпараттық жылжу» бағытымен айналысатын «Алпамыс» қоғамдық бірлестігінің жетекшісі Гүлғана Назырова марапатталды.
Жиынға онлайн режимінде қатысқан Алматы облысы әкімінің орынбасары Арслан Дәндібаев «Басқару негіздерінің мектебі» мемлекеттік емес мекемесінің директоры Любовь Сергеева мен облыстық «Туған тель» татар этномәдени орталығының төрайымы Руфина Усановаға «ҮЕҰ-ға арналған сыйлықты» табыстады.
Мәулен ӘНЕРБАЙ
