Қазақстанның жылжымайтын мүлік нарығында баспана саудасы қатарынан екінші ай бойы төмендеп, белсенділіктің бәсеңдеуі байқалуда, – деп хабарлайды 7-su.kz ақпараттық порталы.
Ұлттық статистика бюросы ұсынған ресми мәліметке сәйкес, тамыз айында елімізде баспана сату-сатып алу бойынша 35 807 мәміле тіркелді. Аталған көрсеткіш шілде айымен салыстырғанда 3,6 пайызға азайса, өткен жылдың ұқсас кезеңімен салыстырғанда бірден 13,5 пайызға төмендеген. Сұраныстың басылуына қарамастан, шаршы метрлердің бағасында баяу өсім сақталып отыр. Алғашқы нарықтағы пәтерлер тамызда 0,6 пайызға қымбаттаса, қайталама нарықтағы баспана бағасы 0,8 пайызға өсті.
Еліміздің басым бөлігінде сауда белсенділігі төмендегенімен, бес өңірде оң динамика байқалды. Атап айтқанда, Алматы қаласында мәміле саны 5,9 пайызға өсіп, 7 690-ды құрады. Қостанай облысында өсім 5,5 пайызды (1 339 мәміле), Қарағанды облысында 5,1 пайызды (2 825 мәміле) құрады.
Жетісу облысында да баспана сату-сатып алу көрсеткіші өсіп, бір айда 3,8 пайызға артты. Өңірде тамыз айында 873 келісімшарт тіркелген. Сондай-ақ Ақтөбе облысында 0,3 пайыздық сәл өсім тіркеліп, 1 384 мәміле жасалды. Сұраныстың ең айтарлықтай төмендеуі Алматы облысында байқалды, мұнда сауда көлемі бірден 21,1 пайызға азайып, 1 800 мәмілеге дейін құлдыраған. Астанада келісімшарттар саны 8,6 пайызға азайып (6 398 мәміле), Шымкентте 1,6 пайызға бәсеңдеді (1 791 мәміле).
Жылдық салыстыру тұрғысынан қарастырғанда, тек үш өңірде ғана оң нәтиже сақталған. Түркістан облысында келісімшарттар саны 9,8 пайызға, Қостанай облысында 3,3 пайызға, Солтүстік Қазақстан облысында 1,1 пайызға артқан.
Сатып алынған мүліктің құрылымына келсек, азаматтар көбіне көпқабатты үйлердегі пәтертерді таңдаған. Тамыз айында жасалған келісімдердің 27 719-ы пәтерлерге, ал 8 088-і жеке тұрғын үйлерге тиесілі. Пәтерлер арасында ең үлкен сұранысқа 1 бөлмелі баспаналар ие болды – 10 806 мәміле. Сонымен бірге 2 бөлмелі пәтерлер бойынша 10 296 келісім, ал 3 бөлмелі баспаналар бойынша 5 425 келісімшарт рәсімделген.
Мамандар сауда көлемінің азаюын маусымдық факторлармен және азаматтардың қаржылық жоспарлауға мұқият қарауымен түсіндіреді. Нарықтағы бағаның күрт өспей, сабырлы қалыпты сақтауы баспана алуды жоспарлап жүрген сатып алушылар үшін тиімді шешім қабылдауға мүмкіндік береді. Оның үстіне елімізде жеңілдетілген ипотекалық бағдарламалар мен тұрғын үй құрылысын қолдау шаралары жүйелі түрде жалғасып келеді.
