II тоқсанда 30 мыңнан астам отбасы eGov.kz порталы арқылы онлайн режимінде алғаш рет атаулы әлеуметтік көмек тағайындауды ресімдеді. Мұндай мүмкіндік азаматтарға мемлекеттік инстанцияларда адамдардың жаппай жиналуын болдырмау және COVID-19 жұқтыру қаупін азайту мақсатында берілді.
Елімізде коронавирустық инфекцияның таралуына байланысты АӘК алғаш рет тағайындау үшін азаматтар электрондық форматта өтініш бере алады. Өтініш беру үшін eGov.kz порталда авторлану қажет және электрондық цифрлық қолтаңбасы міндетті түрде болуы тиіс.
Аталған порталға кіру орындалғаннан кейін жоғарғы оң жақ бұрышында ашылмалы тізім бар батырманы басып, «Электрондық өтініштер» және «Онлайн тапсырыс беру» тетігін таңдау қажет. Бұдан әрі өтініш беруші жеке кабинетке түседі, онда оған «құру» батырмасын басу қажет. Содан кейін («аймақ», «нақты тұратын мекенжайы», «ұялы телефон» және т.б.) жолдарды толтыру талап етіледі. Құжаттардың фотосуретін немесе сканерленген көшірмелерін қоса жіберуі тиіс. Тізімді «Қажетті құжаттар тізімі» сілтемесіне өту арқылы көруге болады.
ЭЦҚ кілттің көмегімен өтінімге қол қою ең соңғы әрекет болады. Ол үшін «Сертификатты таңдау» батырмасын басып, аты «RSA…» деп басталатын файлды таңдаған жөн. Содан кейін ғана жүйе ашық парольді енгізуді сұрайды. Өтініш беру нәтижесінде өтінімге жеке кабинетте мәртебе беріледі.
Естеріңізге сала кетейік, ағымдағы жылдың ІІІ тоқсанында қазақстандықтарға мемлекеттік инстанцияға жүгінбей-ақ АӘК тағайындаудың мерзімін ұзартты. Яғни, ағымдағы жылдың II тоқсанында АӘК алған азаматтар, егер отбасының әрбір мүшесіне шаққандағы орташа табысы өңірлік ең төменгі күнкөріс деңгейінің 70 пайызынан аспаса, III тоқсанда автоматты түрде төлем алуды жалғастырады.
Еңлік КЕНЕБАЙ
