Көксу ауданында өндірістік әлеуетті арттыру бағытындағы жұмыстар жүйелі түрде жалғасуда. Соның айқын дәлелі ретінде аудан әкімі Дәулет Халелов және тиісті мекеме өкілдерімен бірге «Novatech Construction» жауапкершілігі шектеулі серіктестігінің зауытында болып, кәсіпорынның жұмыс барысымен танысты, – деп хабарлайды 7-su.kz ақпараттық порталы.
Жұмыс сапары барысында өндіріс орнының негізгі көрсеткіштері жан-жақты қаралды. Атап айтқанда, зауыттың өндірістік қуаты, өнім шығару көлемі, техникалық мүмкіндіктері мен кадрлық әлеуеті сараланып, кәсіпорынның бүгінгі тыныс-тіршілігіне баға берілді. Қазіргі таңда зауытта темір-бетон бұйымдарын өндіру тұрақты жолға қойылған.
Кәсіпорынның күнделікті өндіріс көлемі оның қарқынды жұмыс істеп тұрғанын көрсетеді. Г10.30-2 маркалы өнімнен тәулігіне 30 дана, Г15.30-2 өнімінен 30-45 дана, ал Г20.30-3 бұйымынан 5 дана шығарылады. Сонымен қатар ЛР-6 – 22 дана, ЛР-8 – 13 дана, ЛР-10 – 2 дана көлемінде өнім өндіріледі. Бұл көрсеткіштер зауыттың нақты өндірістік қуатын айқындап, тапсырыстарды уақытылы орындауға мүмкіндік беріп отыр.
Зауыттың техникалық базасы да жеткілікті деңгейде қамтамасыз етілген. Өндіріс алаңында 2 дана жүк көлігі, 2 текше метрлік 1 погрузчик, 10 текше метрлік 2 миксер және 2 дана козловой кран жұмыс істейді. Аталған техника өндірістік үдерістің үздіксіз жүруін қамтамасыз етіп, еңбек өнімділігін арттыруға жол ашуда.
Сонымен қатар кәсіпорында бетон-смесительный узел (БСУ) іске қосылған. Бұл қондырғы құрылысқа қажетті бетон қоспаларын дер кезінде дайындап, өндіріс процесінің тиімді әрі жүйелі жүргізілуіне ықпал етеді. Нәтижесінде зауыт өз өнімін сапалы әрі уақытылы ұсынуға толық мүмкіндік алып отыр.
Бүгінде кәсіпорында жалпы саны 56 адам еңбек етуде. Оның ішінде 25-і жергілікті тұрғындар. Бұл көрсеткіш әлеуметтік маңызын да айқындай түседі. Жергілікті халықты жұмыспен қамту арқылы зауыт ауданның әлеуметтік-экономикалық дамуына өзіндік үлесін қосуда.
Кездесу барысында аудан әкімі өндіріс орнының әлеуетіне жоғары баға беріп, мұндай кәсіпорындардың өңір экономикасын дамытудағы маңызы зор екенін атап өтті. Сондай-ақ, құрылыс саласының қарқынды дамуы инфрақұрылымдық жобалардың сапалы жүзеге асуына тікелей әсер ететінін жеткізді.
– Өндіріс орындарының тұрақты жұмыс істеуі – аудан экономикасының нығаюының басты кепілі. Осындай кәсіпорындар жаңа жұмыс орындарын ашып қана қоймай, өңірдің инвестициялық тартымдылығын арттыруға да ықпал етеді. Сондықтан біз өндірісті қолдау бағытындағы жұмыстарды жалғастыра береміз, – деді аудан басшысы.
