Індет жұқтыру Жамбыл ауданында да толастамай тұр. Коронавирус жұқтырғандар арнайы ауруханаларда ем қабылдап жатыр. Бұл орайда аурудың алдын алудың маңызын көпшілік дұрыс түсініп, алғашқы кездерге қарағанда екпе алушылардың қатары артты.
Қазіргі кезде ауданда коронавирус індетіне қарсы екпе салу жұмыстары қарқынды жүргізілуде. Ұжым болып жаппай вакцина салдырушылардың қатары көбейе түсті. Солардың бірі – аудан орталығы Ұзынағаш ауылындағы Тұрар Рысқұлов атындағы орта мектебі. Аталған білім мекемесі директорының тәрбие ісі жөніндегі орынбасары Жанат Жақсылықовамен хабарласып, ұстаздардың екпе салдыру жайын сұрап білдік. Оның айтуынша, мектепте жұмыс істейтін қызметкерлер бүгінге дейін тоқсан пайыз шамасында коронавирусқа қарсы вакцинаны қабылдапты.
Тарқатып айтатын болсақ, білім шаңырағында барлығы 194 адам еңбек етеді. Соның 140-ы екпе салдырған. Ал енді вакцина алмағандарға келсек, оның түрлі себептері бар. Атап айтқанда, мұғалімдердің ішінде алтауының аяғы ауыр болса, 8 қызметкер әртүрлі сырқаттарымен дәрігерлердің есебінде тұрғандықтан, оларға екпе салдыруға болмайды, 27 адам бала күтіміне байланысты декреттік демалыста, 2 жұмыскер зейнет жасында, қалған 5 қызметкер оқу жылы басталғанға дейін екпе салдыратын болады. Екпе алмағандардың осындай әртүрлі дәлелді себептері бар.
Осы жылдың басында елімізде коронавирусқа қарсы екпе басталған кезде Т. Рысқұлов атындағы орта мектеп мұғалімдері вакцина салдыруды бірінші болып бастаған еді. Себебі, сол кезде аудан орталығындағы екі орта мектеп ғимаратынан арнайы екпе қосындары ашылғанда, соның бірі осы білім ұясында болды. Сонда аталған мектептің директоры Ақмарал Аққұлиева бірінші болып екпе алып, ұжымына үлгі көрсетті. Басшыдан кейін вакцинаны мектеп әкімшілігі салдырып, одан әрі мұғалімдер жаппай жалғастырып әкетті. Осылайша егу тәртібіне сәйкес ресейлік Спутник V дозасының екі компонентін араға үш апта аралатып алып шықты. Екпе салдырғандардың денсаулықтары қалыпты.
Серік САТЫБАЛДИЕВ
