Бейсен Құранбек атындағы Журналистер үйінде Қазақстан Республикасы Президентінің жанындағы Мемлекеттік басқару академиясына 2026-2027 оқу жылына құжаттар қабылдау науқанының басталуы туралы брифинг өтті. Онда Жетісу өңіріндегі мемлекеттік қызметшілер мен басқару саласына қызығушылық танытқан азаматтар үшін маңызды жаңалықтар айтылды.
Академияның Жетісу облысы бойынша филиалының директоры Жайық Тазабекұлы оқуға түсудің жаңа ережелері мен талаптарын егжей-тегжейлі баяндады.
– «Биылғы оқу жылының басты ерекшелігі – мемлекеттік білім беру тапсырысының, яғни гранттар санының айтарлықтай артуында. Биыл магистратура бағдарламалары бойынша грант саны 80-ге жуық көбейіп, жалпы саны 200-ге жуық адамды қабылдау жоспарланған, ал докторантураға 12 орын бөлініп отыр. Осылайша, мемлекеттік қызметтегі кадрлардың сапасын арттыру көзделіп отыр. Біздің мақсатымыз – тек білім беру емес, заманауи мемлекеттік аппараттың талаптарына жауап бере алатын, стратегиялық ойлайтын басқарушылардың жаңа толқынын дайындау. Биыл гранттар санының көбеюі – талантты азаматтарға берілген зор мүмкіндік», – деп атап өтті.
Оқуға құжаттарды қабылдау процесі биыл 1 сәуірден басталып, 1 маусымға дейін, яғни бар болғаны екі ай ішінде жүзеге асырылады. Барлық үдеріс admission.apa.kz ақпараттық жүйесі арқылы толықтай электронды форматқа көшірілген. Ол үміткерлер үшін уақытты үнемдеуге және ашықтықты қамтамасыз етуге мүмкіндік береді. Оқу бағдарламаларында да бірқатар өзгерістер бар. Мысалы, биыл «ЕМВА – Іскерлік-әкімшілендіру» және «DDPA – Цифрлық мемлекеттік басқару» сияқты жаңа бағдарламалар қосылды. Сонымен қатар, «Мемлекеттік саясат», «Халықаралық қатынастар» және «Экономика» бағыттары ғылыми-педагогикалық бағытқа ауысуына байланысты енді 1,5 жыл емес, 2 жыл оқытылатын болады.
Үміткерлерге қойылатын талаптар мен қажетті құжаттар мәселесі де сөз болды. Оқуға түсуді жоспарлаған азаматтар admission.apa.kz порталына тіркелу кезінде мемлекеттік органның жолдамасын (егер мемлекеттік қызметші болса) және жеке басын куәландыратын құжаттың электрондық көшірмесін жүктеуі тиіс. Оған қоса, жоғары білімі туралы дипломның немесе докторантура үшін жоғары оқу орнынан кейінгі білім туралы құжаттың сканерленген нұсқасын қосымшаларымен бірге дайындау қажет.
Тілдік талаптарға келсек, үміткерлердің мемлекеттік тілді меңгеру деңгейі В1-ден төмен еместігін растайтын QAZAQ RESMI TEST немесе ҚАЗТЕСТ сертификатының болуы міндетті. Ал ағылшын тілін білу деңгейін растайтын халықаралық сертификаттар (IELTS, TOEFL немесе Duolingo) тек докторантура бағдарламалары мен «Халықаралық қатынастар» және «Мемлекеттік саясат» магистратурасына тапсырушылар үшін талап етіледі. Мемлекеттік қызметшілер кадр қызметі растаған қызметтік тізімін жүктесе, басқа үміткерлер еңбек қызметін растайтын құжаттарын ұсынуы керек. Кейбір бағдарламалар бойынша функционалдық жұмыс өтілін растау үшін лауазымдық нұсқаулық пен құрылымдық бөлімше туралы ереже де сұралуы мүмкін. Докторантураға үміткерлер зерттеу жұмысы жоспарының жобасын (research proposal) дайындап, барлық құжаттарды электрондық-цифрлық қолтаңбамен растап, өтініш жіберуі тиіс.
– «Конкурстық іріктеу кезеңдері де өте қызықты әрі салмақты өтпек. 5-7 маусым аралығында үміткерлер аналитикалық эссе жазып, өздерінің талдау қабілеттерін көрсетсе, 5-19 маусымда сұхбат кезеңі басталады. Сұхбат барысында үміткердің кәсіби құзыреттілігі, оқуға деген ынтасы және мемлекеттік басқару жүйесін білу деңгейі бағаланады», – деді Жайық Тазабекұлы.
Оның сөзінше сұхбат офлайн форматта өтеді және бейнежазбаға түсіріледі, бұл іріктеудің әділдігін кепілдендіреді. Іріктеудің алдын ала қорытындылары 25 маусымда белгілі болса, түпкілікті шешім 10 шілдеде шығарылып, оқу 1 қыркүйекте басталады. Ақылы негізде оқуды қалайтындар үшін жинаған балдары мен конкурстық комиссияның сараптамалық бағалауы негізге алынатынын да айта кеткен жөн.
Мәулен Әнербай
