Биылдан бастап мүмкіндігі шектеулі жандар қажетті барлық тауарлар мен қызметтерді «Әлеуметтік қызметтер порталы» арқылы ала алады. Осы орайда Алматы облыстық жұмыспен қамтуды үйлестіру және әлеуметтік бағдарламалар басқармасының басшысы Маржан Мұрат портал туралы кеңінен ақпарат беру мақсатында 28 қоғамдық бірлестіктің өкілімен кездесіп, түсіндіру жұмысын жүргізді.
Әлеуметтік қызметтер порталы 2020 жылдан бастап қолданысқа енгізілді. Бұл жүйе тұрғындардың мемлекет тарапынан берілетін көмектерге, яғни, оңалтудың техникалық құралдарына өздері тапсырыс беруге мүмкіндік береді. Бұрын әлеуметтік жеңілдіктерге қол жеткізу үшін мүмкіндігі шектеулі жандар бірнеше ай уақытын жоғалтатын. Енді портал арқылы кез келген кезде тапсырыс берушімен келісіп, қажетті тауарын ала алады. Осы жөнінде облыстық жұмыспен қамтуды үйлестіру және әлеуметтік бағдарламалар басқармасының басшысы Маржан Мұрат:
– Портал енгізілмей тұрып, мүгедектігі бар жандардың қай санаторийге бару керектігін біз таңдайтынбыз. Енді порталға кірсе, 15 санаторий тұрады. Соның қайсысы ыңғайлы, қайсысы үйіне жақын, соны қызмет алушы таңдайды. Бұл жерде бір ескере кететіні – тек компьютермен ғана жұмыс жасайды. Соған байланысты, компьютердің, интернет желісінің қолжетімділігі сынды қиындықтары бар. Туындаған мәселелерді оңтайландырып, шешу жолдары да қарастырылған. Жауапты мекемелер тиісті түрде қызмет етіп кетуіне барлық күшін салып, қолайландырып, бүгінгі күні жүзеге асырып отыр. Порталдың мобильді қосымшасы әлі дайын болмады. Десе де, қосымша жыл соңына дейін жүктеу платформаларында пайда болады деп күтілуде, – дейді.
Жиын барысында мүмкіндігі шектеулі жандардың жеке көмекшіге қатысты сұрақтарына да жауап берілді. Яғни, жеке көмекшінің жұмысы, порталда рәсімдеу, көмекшіні таңдау сынды мәселелер талқыланды. Одан бөлек, порталмен жұмыс жасағанда табель толтыру кезінде қиындықтарға тап болады екен. Нақтыласақ, бүгін көрсетілген қызметті толтырып үлгермей қалса, база жабылып қалатын көрінеді. Бұл өз кезегінде порталмен жұмыс жасауды енді үйреніп жүрген жандар үшін қиындық туғызады. Осы сынды мәселелер алдағы уақытта оңтайландырып, шешімін табатын болады.
Айта кетерлігі, әлеуметтік қызметтер порталы мүгедек жандардың жұмысын жеңілдетумен қатар оларға таңдау құқығын береді. Жүйеге бүгінде 55 қызмет түрі енгізілген. Сондай-ақ, порталда Алматы облысы бойынша оңалтуға арналған құрал-жабдықтармен қамтамасыз ететін 7, санаторлы-курортты қызмет көрсететін 6, әлеуметтік қызмет көрсететін жеке көмекшілерге қатысты 44 жеткізуші тіркелген. Жыл басынан порталға 2824 өтініш түсіп, 1800-ден астам тапсырыс жасалған. Қазіргі таңда өңірде 67 мың мүгедектігі бар адам тіркелген.
Еңлік АРЫҚБАЙ
Алматы облысы
Сурет — ғаламтордан
