Республика аумағында түңдігін түрген «Біз біргеміз» акциясы Алакөл ауданында да өз жалғасын табуда. Талай тұрғынның тірсегінен қаққан төтенше жағдайда жомарттық танытып, қайырымдылықтың көшін сүйреген алакөлдік атымтайлар 429 отбасына 13 млн. теңгенің көмегін көрсетті.
Көптеген жұмыс тоқтаған сәтте қалтаның емес, халықтың қамын ойлаған азаматтардың бұл ісі талай отбасыға қуаныш сыйлады. Мемлекет басшысы Қасым-Жомарт Тоқаевтың тұрғындардың әлеуметтік әлсіз топтарына ықпалдасуды көздейтін ұсынысын қолдағандардың қатарында «ZHERSU» корпорациясы бақылау кеңесінің төрағасы Бауыржан Оспанов, Сауат Мыңбаевтың демеушілігіндегі «Алакөл білім беру қоры» қоғамдық қоры, «Абдрахманов» ЖШС-нің басшысы Елжан Абдрахманов және Балқаш ауданынан Алмас Қыстаубаевтың жетекшілігіндегі «Бірлік» ЖШС болды.
Жүк көліктеріне тиелген қорап-қорап азық-түлік аудандағы әр ауылдық округтерге аттанып, мұқтаж отбасыларға табысталды. Әр қорапта 25 келі ұн, 10 келі күріш, 5 келі қант, 3 литр май және өзге де қажетті заттар болды. Айта кетерлігі, мұқтаж жандарға бұлардан бөлек Қайыңды ет өңдеу цехында дайындалған фарш, ет, қазы-қарта мен ақсақалдардың несібесі деп қойдың басы да табысталды.
Алмат ЕСЕНБЕКОВ,
Алакөл ауданы
