Халықаралық отбасы күніне орай Талдықорған қаласындағы «Жетісу жастары» ғимаратында облыстық ішкі саясат басқармасының қолдауымен және «Азаматтық бастамаларды қолдау орталығы» коммерциялық емес акционерлік қоғамының тапсырысы аясында ұйымдастырылған «Отбасы – құндылықтар мектебі» атты ашық кездесу өтті.
Студент жастар, қоғам белсенділері, үлгілі отбасылар мен облыстық «Мерейлі отбасы» байқауының жүлдегерлері қатысқан тағылымды шарада отбасындағы сыйластық, ата-ана жауапкершілігі, ұрпақтар сабақтастығы мен қазіргі қоғамдағы рухани құндылықтар кеңінен сөз болды.
Облыстық Азаматтық Альянс жетекшісі Дания Қыдырбаева отбасының қоғамдағы орны туралы ойымен бөліссе, «Мүшелтой» аула клубының мүшелері Қарлығаш Ибрагимова, Назира Әлібаева, Ләтипа Тыналиналар отбасындағы татулықтың маңызы туралы кеңінен сөз қозғады.
Шараның мазмұнын тереңдете түскен тағы бір маңызды сәт – облыстық «Мерейлі отбасы» байқауы жүлдегерлерінің қатысуы болды. Олар жастарға отбасы бақытының басты сыры – ауызбіршілік пен өзара құрмет екенін айтты.
– Бақытты отбасының құпиясы байлықта емес, бірлікте. Шаңырақтағы татулық пен түсіністік кез келген қиындықты жеңуге көмектеседі, – дейді қонақтар.
Жиын аясында ұйымдастырылған «Ұрпақтар диалогы» алаңында жастар мен аға буын өкілдері арасында ашық пікір алмасу өтті. Қатысушылар әлеуметтік желінің отбасы тәрбиесіне әсері, ата-ана мен бала арасындағы қарым-қатынас, әке мен ананың рөлі жөнінде ой қозғады.
Кездесу барысында отбасы тақырыбындағы әндер шырқалып, қатысушылар жүрекжарды естеліктерімен бөлісті. Жастар аға буынның өмірлік тәжірибесіне құлақ асып, өздерін толғандырған сауалдарға жауап алды.
Сарби ӘЙТЕНОВА
