Облыстың цифрлық экожүйесін дамыту және жас ІТ мамандарды қолдау мақсатында Талдықорғанда ауқымды технологиялық жарыс – «Digital Regional Hackathon» өтті. Іс-шара IT-Hub Jetisu Digital алаңында ұйымдастырылды.
Аталған шараның негізгі мақсаты – жас мамандарды қолдау, цифрлық бастамаларды дамыту және қалалық инфрақұрылымды жетілдіруге арналған тың шешімдер ұсыну. Ұйымдастырушы ретінде «Инновациялық технологиялар паркі» автономды кластерлік қорының Талдықорған қаласындағы филиалы жұмыс жүргізді.
Жиын барысында қатысушылар бір күн бойы қарқынды жұмыс істеп, өңірді цифрландыруға бағытталған IT жобалардың прототиптерін әзірледі. Әсіресе, мемлекеттік қызметтерді автоматтандыру, Smart City технологияларын енгізу секілді бағыттарға ерекше назар аударылды.
Ұйымдастырушылардың айтуынша, мұндай хакатондар аймақтың цифрлық экожүйесін дамытуда маңызды рөл атқарып, IT саласына деген қызығушылығы жоғары жас мамандардың нақты жобалар ұсынуына мүмкіндік береді.
Қатысушылар бұл тәжірибе командалық жұмыс дағдыларын жетілдіруге және қысқа уақытта нақты өнім жасауға үлкен мүмкіндік болғанын айтады. Сонымен қатар, менторлардың қолдауы мен жаңа білімнің болашақта пайдасы зор екенін жеткізді.
Жұмыс офлайн форматта, тәжірибелі тәлімгерлердің жетекшілігімен өтті. Соның нәтижесінде командалар жобаларын тек әзірлеп қана қоймай, нақты жұмыс істейтін деңгейге жеткізе алды. Жаңа бастамалар сарапшылар тарапынан жоғары бағаланып, алдағы уақытта жүзеге асуы мүмкін жобалар қатарына енді.
Іс-шараға арнайы спикер әрі коуч ретінде Ұлан Үсенов қатысып, өз тәжірибесімен бөлісті. Ол бүгін ұсынылған жобалардың деңгейі жоғары болғанын, қатысушылардың ойлау қабілеті мен кәсіби дайындығы айқын көрінгенін атап өтті.
«Digital Regional Hackathon» өңірдегі цифрлық технологиялардың дамуына серпін берген маңызды қадам болды. Бұл бастама жастардың елді жаңғырту үдерісіне белсенді түрде қатысып жатқанын тағы бір мәрте дәлелдеді.
Медет ЖҰМАБАЙ
