Талдықорғандық бір топ тұрғын «Құлагер» шағын-ауданындағы №24 үйде қоныстойын тойламақ. Қуаныш иелерін облыс әкімі Бейбіт ИСАБАЕВ арнайы құттықтап, пәтер кілтін табыс етті.
2025 жылдың сәуір айында «Otbasy Qurylys Group» ЖШС мердігерлік ұйымы бастаған көпқабатты тұрғын үй құрылысына көпшілік дән риза. Сапалы салынған 48 пәтерлі тұрғын үйде бір бөлмелі 12, екі бөлмелі 12 және үш бөлмелі 24 пәтер бар. Пәтерлердің жалпы ауданы 2817,5 шаршы метр. Баспана тұрғын үй кезегінде тұрған халықтың әлеуметтік осал санатындағы азаматтарға берілді. Олардың қатарында толық емес, көпбалалы отбасылар, мүмкіндігі шектеулі жандар, ерекше балаларды тәрбиелеп отырған және материалдық жағдайы қиын отбасылар бар.
Тұрғындардан бір тілек
Мархамат ҚАСЕНОВА:
– 9 жыл бұрын үй кезегіне толық емес отбасы санаты бойынша тіркелдім. Үш баламмен пәтер жағалап, біраз қиналдым. 3 бөлмелі пәтер кілтін облыс басшысының қолынан алып, қуанышым қойныма сыймай тұр. Енді бала-шағаммен көшіп келемін. Мемлекет басшысына, облыс, қала әкімдеріне аналық жүрегіммен алғыс айтамын.Мұхамед БОТАЛБАЕВ:
– Апамның қамқорлығында өстім. Жетім бала санаты бойынша 2011 жылы үй кезегіне тұрдым. Осы уақытқа дейін айына 120 мың теңге төлеп, жалдамалы пәтерде тұрдық. 2 жасар ұлым бар. 2 бөлмелі кең сарайдай пәтер кілтін қолымызға алып тұрсақ та әлі сене алар емеспіз. Ел ағаларына алғыс айтамын.
Жаңа баспана иелерін құттықтаған облыс басшысы халықтың тұрмыс сапасын арттырудағы басты бағыттардың бірі – қолжетімді тұрғын үймен қамтамасыз ету екенін айтты.
– Баспана – әрбір азаматтың баянды тіршілігінің, отбасы берекесінің бастауы. Қолжетімді баспана, сапалы ауызсу, жол, газдандыру және халықты лайықты жұмыспен қамтамасыз ету, балабақша, мектеп, аурухана салу – халықтың жақсы өмір сүру сапасы мен деңгейін арттыруға тікелей әсер етеді. Мемлекет басшысының алға қойған басты мақсаты да осы. Сондықтан біз тұрғын үй құрылысының көлемін жыл сайын арттырып келеміз. Мәселен, соңғы төрт жыл ішінде облыста 1,4 миллион шаршы метр тұрғын үй қолданысқа берілді. Соның ішінде 11 мыңға жуық отбасы баспаналы болды. Биыл тағы 3 мыңнан астам адам үйлі болады деген жоспар бар. Бұл ретте тұрғын үй құрылысының үлкен көлемі Талдықорған қаласына тиесілі екенін ерекше айтқым келеді. Жалпы, Талдықорғанда өткен жылы 630-дан астам адам үйлі болса, биыл жыл соңына дейін қалада 1400-ге жуық баспана салынады деп жоспарлануда. Облыс құрылғаннан бері қалада әлеуметтік осал топтағы 2358 азаматқа үй берілді, – деді аймақ басшысы.
Жыл басынан бері 415 отбасы баспаналы болды. Оның ішінде бүгін 32 отбасы қоныстойын тойлады. Бұл – мемлекеттік тұрғын үй бағдарламаларының нәтижесі.
Еңлік Кенебай
