Қарасай аудандық Мәдениет үйінде орналасқан «Тіл» оқу-әдістемелік орталығында «Оқытудың жаңа әдіс-тәсілдері» атты облыстық көшпелі семинар өтті. Облыстық «Тіл» оқу-әдістемелік орталығының бастамасымен ұйымдастырылған жиында мемлекеттік тілдің ел тұтастығы мен бірлігі үшін маңызы туралы және де қазақ тілін оқытудың әдістемесін жетілдіру мәселесі жайлы айтылды.
Аталған жиынға Қарасай, Еңбекшіқазақ, Талғар, Іле, Ескелді, Балқаш аудандары мен Текелі, Қапшағай қалаларында орналасқан орталықтардың меңгерушілері мен мамандары және бірқатар жоғары оқу орындарынан арнайы шақыртылған оқытушылар қатысты
Жиын барысында филология ғылымдарының докторы, әл-Фараби атындағы Қазақ ұлттық университетінің оқытушысы Орынай Жұбаева мен филология ғылымдарының кандидаты, Сулейман Демирел атындағы университеттің аға оқытушысы Бота Хасен өздерінің дайындаған баяндамаларын оқып, қазіргі таңда тіл ережелерін оқыту кезінде жіберілетін қателіктерге кеңінен тоқталды. Сондай-ақ, мемлекеттік тілде іс жүргізудің қалай жүзеге асып жатқандығына, қазақ тілінде сөйлеген кезде адамдардың қандай қателіктер жіберетіндігі жайлы кеңінен айтып өтті. Өткір мәселені көтерген баяндамашылар еліміздегі қазақ тілінің бірқатар ережелерін қайта қарап, оның мәртебесін арттыру мәселесі бойынша өз ойларымен бөлісті.
Мемлекеттік тілдің мерейін қайтсек үстем етеміз деген жанашырлар жиналған алқалы жиында талай мәселе көтерілді. Сондай-ақ, тілдің қолдану аясын кеңейту үшін қандай шаралар атқару қажеттігі жөнінде кеңінен талқыланды. Оқыту мәселесін жетілдіру мақсатында өткен семинар «Тіл парасат» атты мемлекеттік тіл білгірлері байқауымен жалғасты.
Өзге этнос өкілдері бола тұра бүгінде қазақ тілін жетік меңгеріп, әр аудан мен қалалардағы орталықтарда сабақ алып жүрген тыңдаушылар арасында ұйымдастырылған байқау төрт кезеңнен тұрды. Оның барысында сайыскерлер өзін дұрыс таныстыра білу, емле ережелері жағынан, биыл мерейтойы аталып жатқан Жамбыл атамыздың өмірі мен шығармашылығы жайлы қаншалықты жақсы білетіндігі туралы өзара жарысып, өздерін үкілеп жіберген өңірлерінің ғана емес, тілдің мәртебесін биіктетуге тырысып бақты.
Танымдық байқау соңында қатысушылардың барлығы Алғыс хаттармен марапатталып, қаржылай сыйлықтар табысталды.
Қуат ҚАЙРАНБАЕВ
Қарасай ауданы
