«Бүгінгі білімді ұрпақ – ертеңгі білікті маман». І. Жансүгіров атындағы Жетісу университетінің «Zhansugurov College» дәл осы пікірді ұстанады. Осы орайда колледж директоры Марат Мәлтекбасовтың басшылығымен жас ғалымдардан құралған «Ғылыми Startup академия орталығы» құрылған. Оның мүшелері – білуге, үйренуге, жаңашылдыққа жаны құмар колледж білімгерлері.
Жас ғалымдар құрамының мақсаты – терең білімге, белсенді дамуға, жаңа белестерді бағындыруға құштар жастармен жұмыс істеп, олардың әлеуметтік-инновациялық жобаларын тәжірибе жүзінде жүзеге асыруға бағытталған.
2019-2021 жылдары колледждің ғылыми даму қарқыны жоғары деңгейде болды. Республикалық, облыстық, қалалық Startup, IT байқауларда білімгерлеріміздің жобалары үздіктер қатарынан көрінді. Атап айтсақ, 2019 жылы туризм мамандығының білімгері Кенже Сұңқар ұсынған инновациялық-ақпараттық портал «Талдықорғанға саяхат» жобасы «Jetisý – Startup» инновациялық идеялар мен стартап жобалар байқауында III орынға ие болды. Талдықорған қаласы бойынша жоғары және арнаулы орта оқу орындарының студенттері арасында өткізілген үздік әлеуметтік идеялар мен жобалар байқауына қатысқан шәкірттеріміз жүлделі І және ІІІ орындарды иеленді.
Биыл құқықтану мамандығының білімгерлері Мадияр Малдыбеков, Лейла Бірімтай, Адэлия Хасанованың «QR-код негізіндегі кітап және тест жинағының жаңа үлгісі» атты жобасы Жетісу университетінің «Jetisý — Startup» инновациялық идеялар мен стартап жобалар байқауында II орын алса, ақпараттық жүйе мамандығының білімгері Сапар Сұлтан «Биологиялық ыдырайтын полилактидті полимерлер» жобасымен III орын тұғырынан көрінді.
Талдықорған Жоғары политехникалық колледжі ұйымдастырған «IT project» жобасында Лейла Бірімтай, Адэлия Хасанова, Мадияр Малдыбековтың жобалары I орын, Кенже Сұңқар ұсынған жоба III орын алып, үздік жоба атанды.
Колледжіміздің білімгерлері республикамыз бойынша жоғары және арнаулы орта оқу орындарынан 52 студенттік команда қатысқан «Enactus Kazakhstan National Expo 2021» байқауында 3-орынды еншіледі.
Жас ғалымдар құрамынан Сапар Сұлтан, Бірімтай Лейла, Өмірсерік Шолпан және Адэлия Хасанова Республикалық колледж студенттеріне арналған «Student Energy Challenge-Junior» байқауында 1-орынды иеленіп, 1 жыл бойы ай сайын 40 000 теңге шәкіртақы алу мүмкіндігіне ие болды. Осы байқаудың ең алғашқы жеңімпаздары болып «Zhansugurov college»-нің студенттері танылды.
Жобаны іске асыру бойынша жас ғалымдарымыз көптеген курсқа қатысып, түрлі мамандардан кеңес алды. Жастардың қашанда жаңашылдыққа жаны құштар. Ғылым жолына қадам басқан білімгерлеріміздің әлі талай шыңды бағындырарына сенеміз. Оларды ынталандырып, бағыт-бағдар беру – біздің парызымыз. Осы орайда студенттер арасында колледжішілік инновациялық идеялар мен startup жобалар байқауы өткізіліп, жеңімпаздарды колледж директоры Марат Мәлтекбасов дипломмен және бағалы сыйлықтармен марапаттады.
Қазіргі таңда біздің жас ғалымдарымыз өз білімін шыңдап, Республикалық «Мен кәсіпкермін» жобалар байқауына 5 бағыт бойынша қатысуға өтініш жолдады. Атап айтсақ, «Пластикалық қалдықтардан эко блок шығару үшін жұмыспен қамту», «Ақылды арба», «Qr-код негізіндегі тест және оқулықтар жинағы», «Экологиялық таза энергия өндіретін цилиндр», «Энергия өндіретін тақтайшаларды өндіріске шығару» жобаларымен қатысып, бақтарын сынамақ. Сонымен қатар республикалық «Рухани жаңғыру» бағдарламасы бойынша әлеуметтік жобалар акселераторы байқауына «Энергия өндіретін инновациялық тақтайша» жобасымен қатысуда.
Қазіргі таңда ғылым саласы түбегейлі жаңару, жаңғыру үстінде. Елімізде білікті мамандар, айтулы жетістіктер мен әлемдік деңгейдегі зертханалар бар. Олай болса колледжіміздің жас ғалымдарына жаңа биіктерді бағындыруда сәттілік тілейміз.
Гүлмира Абзалқызы,
«Zhansugurov College» ғылыми Startup академия орталығының жетекшісі
