Мемлекетіміздің білім беру үдерісіне енген жаңартылған білім беру бағдарламасы – заман талабына сай келешек ұрпақтың сұранысын қанағаттандыратын құзыреттілікке және сапаға бағытталған тың бағдарлама. Оның негізгі мақсаты – білім мазмұнының жаңаруымен қатар критерийлер арқылы бағалау жүйесін енгізу және оқытудың әдіс-тәсілдері мен әртүрлі құралдарын қолданудың тиімділігін арттыру.
Қазақстанда білім беруді дамытудың 2020-2025 жылдарға арналған мемлекеттік бағдарламасы жобасында отандық оқу жүйесін жақсарту үшін ең алдымен педагог кадрлардың мәртебесін арттырып, біліктілігін дамытуға үлкен мән берілген. Осыған байланысты еліміздің білім беру жүйесіндегі реформалар, өзгерістер мен жаңалықтар мұғалімнің өткені мен бүгіні, келешегі мен болашағы жайлы ойланып, жаңа идеялармен жұмыс жасауға негіз болады.
Бүгінгі таңда білім беру жүйесі болашақтың талабына сәйкес дамуы тиіс. Оқушыларды заманауи әдіс-тәсілдермен оқытып, ой-өрісі кең, саналы, еркін азамат етіп тәрбиелеу қажеттігі де осы себептен туындап отыр. Жаңартылған білім беру бағдарламасының мәні – баланың функционалды сауаттылығын қалыптастыру. Оқушы өзінің мектеп қабырғасында алған білімін өмірінде қажетке асыра білуі керек. ХХІ ғасырда өмірдің барлық саласында табысты болуы үшін, оқушылардың бойына қажетті дағдыларды дарыту үшін мұғалімдер тынымсыз еңбектенуі керек.
Оқушыларға өмір ағысындағы барлық жаңашылдықты дер кезінде жеткізіп, оқушының функционалдық сауаттылығын арттырып отыру үшін мұғалім үнемі өзінің кәсіби шеберлігін арттырып отыруы керек деп ойлаймын. Осы орайда «Өрлеу» БАҰО» АҚ филиалы «География пәні мұғалімінің кәсіби құзыреттіліктерін дамыту» шеңберінде ZOOM бағдарламасы арқылы қашықтан екі апталық курстан өттік. Курсты «Өрлеу» БАҰО» АҚ филиалы Алматы облысы бойынша ПҚБАИ «Жаратылыстану және гуманитарлық пәндерді оқыту әдістемесі» кафедрасының тренері, аға оқытушы Ләззат Адыбаева жүргізді. Бұл география пәні бойынша пәндік курс болғандықтан мұғалімдер география пәнінен кәсіби құзыреттіліктерін жетілдірді, 5-11-сынып аралығындағы оқу бағдарламасымен таныстық. Бұл курста төрт модуль бойынша білім жетілдірдік. Демек, нормативтік-құқықтық, педагогикалық-психологиялық, мазмұндық және технологиялық модуль бойынша білімімізді көтеріп, дәрістер тыңдап, практикалық жұмыстар орындадық.
Курсқа қатысушылар оқытудың жаңа бағдарламасын тәжірибеге енгізудің тиімді жолдарын қарастырып, өзара тәжірибе алмасты, маңызды ойларымен бөлісті. Бұл курстың білім беру бағдарламасын жаңарту және критериалды бағалау жүйесін енгізу тұрғысынан мұғалімдердің педагогикалық шеберлігін жетілдіру бағытында әдістемелік көмек ретінде берері мол болды.
Көңіл қойып, ой түйетін маңызды сәттер – шиыршықты оқытудың мазмұны, жаңа бағдарлама бойынша әр сабаққа қысқамерзімді жоспар құрастыру, оқып үйренген әдіс-тәсілдер біздің педагогикалық білімімізді тереңдете түсті. Білім алудан еш жалықпадық. Жалпы курсқа қатысушылар осы курстың бағдарламасын өте жақсы қабылдады. Тренер Ләззат Дүнгенбайқызы қолданған әдіс-тәсілдер өте қызықты әрі ұтымды болды. Сабаққа күнде қызығушылықпен қатыстық.
Курстан үйренгеніміз көп. «Ұстаздық еткен жалықпас, үйретуден балаға» демекші, білім беру бағдарламаларының өзіндік ерекшеліктері күн сайын ашылуда. Осы жаңалықтар мен жаңашылдықтарды дұрыс ұғынып, балалардың санасына жеткізе білсек, арманымыз асқақ, үмітіміз зор болмақ.
Сәуле ӘЛІМҚҰЛОВА,
Тарғап ауылындағы орта мектептің директоры,
география пәні мұғалімі
Жамбыл ауданы
