Талдықорған қаласындағы «Береке» коттедж қалашығында тұрғындарға жаңа үйлердің кілті табысталды.
Салтанатты шарада әлеуметтік осал топтағы азаматтар баспаналы болды. Жаңа үйлер Қазақстан Республикасының қолданыстағы заңнамасына сәйкес тұрғын үй кезегінде тұрған адамдарға кезек тәртібімен берілді.
Жаңа тұрғын үйлердің кілтін табыстау салтанатына қала әкімі Ернат Бәзіл қатысып, қоныс иелерін қуаныштарымен құттықтады.
Шаһар басшысы өз сөзінде халықты тұрғын үймен қамтамасыз ету мемлекет саясатының басты бағыттарының бірі екенін, сондай-ақ, бұл игі бастама халықтың әл-ауқатын арттыруға және әлеуметтік тұрғыдан қолдауға бағытталғанын атап өтті.
– Облыс әкімі Бейбіт Исабаевтың қолдауымен Талдықорғанда тұрғын үй құрылысы қарқынды дамып келеді. 2024-2025 жылдары «Береке» коттедж қалашығындағы 204 тұрғын үйді қалпына келтіру бойынша ауқымды жұмыс атқарылды. Нәтижесінде 2025 жылы 97 тұрғын үй пайдалануға берілді. Ал бүгін тағы 65 отбасы жаңа баспананың кілтіне ие болды. Алдағы уақытта да халықты жайлы баспанамен қамту бағытындағы жұмыстар жалғасады. Барша қоныс иелерін шын жүректен құттықтаймын, әр шаңыраққа береке-бірлік, бақ-дәулет пен баянды бақыт тілеймін!, – деді Ернат Бәзіл.
Өз кезегінде жаңа қоныс иелері мемлекет тарапынан көрсетіліп отырған қолдау үшін ризашылықтарын білдірді.
– Бүгін мен үшін ерекше қуанышты күн. 7 жыл күткен баспанамызға қол жеткізіп, балаларыммен бірге өз шаңырағымыздың табалдырығын аттап отырмыз. Осы қуанышқа себепкер болған барлық азаматқа шын жүректен алғысымды білдіремін. Әр отбасының өз үйі, өз берекесі болып, әр шаңырақтан бала күлкісі естілсін! Баспаналы болуды армандаған жандардың тілегі орындалып, қуаныштары еселене берсін, – деді көпбалалы ана Әсемжан Смағұлова.
«Береке» коттеджді қалашығындағы жаңа үйлер заманауи талаптарға сай салынған және тұрғындардың жайлы өмір сүруіне қажетті инфрақұрылыммен қамтамасыз етілген.
Айгүл БАЙБОСЫНОВА
Талдықорған қаласы
