Жетісу облысында жазғы лагерьлер өз жұмысына кірісті. Биыл өңірдегі 10 мыңнан астам мектеп оқушысы қала сыртындағы арнайы сауықтыру орындарында тынығады, – деп хабарлайды 7-su.kz ақпараттық порталы 24.kz сайтына сілтеме жасап.
Әлеуметтік санаттағы отбасылардан шыққан балаларды сапалы демалыспен қамту мақсатында облыс бюджетінен 454 миллион теңгеден астам қаражат бөлінді. Жазғы демалыс орындарында жасөспірімдерге патриоттық тәрбие беріліп, психологиялық дамыту сабақтары өткізілуде. Сонымен қатар оқушылар әртүрлі зияткерлік, мәдени және спорттық сайыстарға қатысып, өзара бақ сынасуда.
Биылғы маусымда келген балалардың алғашқы легі демалыс орнына орналасты. Жаз соңына дейін тек осы орталықта 1800 жеткіншек тынықпақ. Лагерьде демалып жатқан оқушы Ақбота Болат:
«Лагерь өте қызық. Әртүрлі іс-шаралар өтеді. Кеше мысалы, бізде «Алтын чажа» лагерінің Ханзадасы мен Ханшайымы өтті. Сол кезде мен өз бөлімімнен шығып, бас жүлде алдым», – деді.
Тағы бір демалушы Сезім Жайлыбекқызы:
«Лагерь өте керемет. Мен өте көп дос таптым. Команданың капитаны болғандықтан бәріміз дос болып жүрміз. Асхананың тамағы өте қатты ұнады. Іс-шаралар болады. Көңілімнен шығып жатыр», – деді.
Демалыс орнының директоры Гүлжан Қожахметова:
«Біздің лагерь спорттық-сауықтыру бағытын ұстанады. Балалардың ағылшын тілін жетілдіруімен ерекшеленеді. Сонымен қатар демалыс орнындағы әрбір оқушымен психолог жұмыс істейді. Мәдени шаралар да көптеп өткізіледі», – деді.
Сала мамандары облыстағы 120 мыңнан астам оқушының 90 пайызға жоғары бөлігі жазғы демалыспен қамтылатынын мәлімдеді. Білім басқармасына қарасты Ғылыми-тәжірибелік орталық директорының орынбасары Бари Ғизатов:
«Әр лагерьлерде камералар орнатылған. Күзет жұмыс істейді. Балаларды тәрбиешілер қадағалайды. Одан басқа тамақ жағынан таңертеңгі тамақ, түскі ас, кешкі асты СЭС үнемі қадағалап отырады. Балалардың жай-күйімен ата-аналар да танысып тұрады», – деді.
Текелі қаласының тұрғыны Эльмира Иманбердиева демалыс орнына келіп, жиен немерелерінің жағдайын біліп қайтты. Эльмира Иманбердиева:
«Біздің Текеліні кішкентай Швейцария деп атайды. Себебі керемет өзен ағып жатыр. Табиғат аясында керемет демалыс болып жатыр. Балаларымыз таза ауада демалса керемет мықты азамат болатынына сенімдімін. Балаларымызға қатты ұнап жатыр», – деді.
Аймақта жалпы 10 жазғы лагерь бар. Алакөл ауданындағы демалыс орны ескіруіне байланысты күрделі жөндеуге жабылып, қазіргі уақытта облыс бойынша 9 лагерь жұмыс істеп тұр. Сонымен қатар өңірдегі 300-ге жуық мектепте оқушылардың бос уақытын тиімді өткізуге арналған арнайы орталықтар ашылды. Аталған мекемелерде биыл 116 мыңнан астам жеткіншекті жазғы демалыспен қамту жоспарланып отыр.
