Райымбек ауданындағы Сарыжаз ауылының маңында шаңғы спортынан облыстық чемпионат өтті. Жылы да жайдары күн, аппақ қардың аясында өткен жарысқа облыстың барлық аудандарынан екі жүзге тарта шаңғышылар қатысты.
Жарыстың ашылу салтанатында Райымбек ауданы әкімінің орынбасары Нұрбол Сағатбекұлы, облыстық дене шынықтыру және спорт басқармасының бөлім басшысы Алмат Үшкемпіров сөз алып, шаңғышыларға сәттілік тіледі. Райымбек ауданындағы «Қамқор-2» кәсіподағы қоғамдық бірлестігінің төрағасы Ұлықпан Әбек «Жыл сайын шаңғыдан облыстық жарыс өткізіліп жүрген осы өңірден бір шаңғы базасын салған абзал. Осы мәселе облыстың назарында болса игі» деген ұсынысын жеткізді. Кеген аудандық дене шынықтыру және спорт бөлімінің басшысы Гайдар Мұқанғожаев екі аудан бірігіп, Райымбек ауданы болып тұрған кезде 2008 жылдан бастап дәл осы Сарыжазда шаңғыдан облыстық бәсекенің өткізілуіне негіз қалағандарын айта келіп, спортшыларға ізгі тілегін білдірді.
Екі күнге созылған жарыстың қорытындысы бойынша Райымбек ауданының шаңғышылар командасы 1-орынды жеңіп алды. Талғар, Еңбекшіқазақ аудандарының командалары 2 және 3-орыннан көрінді. Жеңімпаздар облыстық дене шынықтыру және спорт басқармасының медальдары, дипломдары, кубоктарымен марапатталды.
Қанат БІРЖАНСАЛ
Райымбек ауданы
