Текеліде саятшылардың турнирі өтті. Дәстүрлі жарысқа Жетісу өңірінің аудан, қалаларынан 15 құсбегі қатысты. Олар тазы жарыстырып, баптаған бүркіт, қаршыға, сұңқар, ителгі сынды құстарын аңға салып, өзара бақ сынасты.
Түсей Әбдікерім өмірін саятшылыққа арнаған құсбегілердің бірі. Атакәсіпке жастайынан аңсары ауып, бүгінге дейін қол үзбей келеді. Оның Сарша және Ақжелке атты екі бүркіті бар. Осы бүркіттерімен биыл қыста 18 түлкі, 1 шибөрі ұстаған. Түсей ақсақал Ақсу ауданының намысын қорғауда.
– Сарша балапан кезінде қырдан тормен ұсталған. Мұны мен құсқа тор құрушылардан алдым. Жасы 3-те. Жалпы жүйрік атты баптағандай, құсты да баптай білу керек. Бүркіттің жеген асы адал болуы керек. Ал іші таза болған соң оның ұстамайтын аңы болмайды. Қолға шақырғанда лезде келуі де соған байланысты, – дейді ол.
Сайыс қолға шақыру, шырғаға салу, қоянға түсіру сынды 3 кезеңнен тұрды. Ең бірінші, Қаршыға және ителгілер қолға шақырылып, арнайы көрсетілім қойылды. Артынша бүркіттерге кезек берілді. Ұйымдастырушылардың айтуынша, бекзат өнерімізге ден қойғандар саны жылдан жылға көбейіп келеді.
– Бізде әртүрлі жастағы бүркіттер бар. Балапандар, тірнектер, одан кейін 16-18 жастағы бүркіттер бар. Менің өзімнің бүркітім, Айқабақ 18 жаста. Биылғы халықаралық жарыста 2-орын алды. Қартайдым деп тұрған жоқ. Әлі талай жарыста олжа салады. Қазақ халқымен бірге жасасып келе жатқан ұлттық спортымызды насихаттау борышымыз, – дейді облыстық саятшылар федерациясының президенті Бүркітбай Файзоллаұлы.
Турнир қорытындысы бойынша Әзен Шәймерденнің «Ерке» бүркіті III орын, Түсей Әбдікәрімнің «Ақжелке» бүркіті II орын, Ғалымбек Бүркітбайдың «Ақбөртесі» I орын жеңіп алды. Тазылар арасында Керілбек Баянның «Қаңбағы» III орын, Елдос Бердиевтің «Дауылы» II орын, Марат Жұмаділовтің «Тұмары» I орын иеленді. Жүлдегерлер Грамота және қаржылай сыйлықпен марапатталды.
Медет ЖҰМАБАЙ
Текелі қаласы
