Облыс әкімінің орынбасары Жақсылық Омардың төрағалығымен кеңейтілген жиналыс өтті. Барлық спорт саласының мамандары, аудан әкімдерінің орынбасарлары бас қосқан жиында биылға қорытынды жасап, келер жылда атқарылатын жоспарлар сараланды. Балалар мен жасөспірімдер және мектеп жасындағы оқушылар спортын дамыту жайлы әңгіме қозғалды.
Бірінші облыстық дене шынықтыру және спорт басқармасының басшысы Тұратбек Шарапиев баяндама жасады. Басқарма басшысының мәлімдеуінше, өңірде атқарылып жатқан іс ауқымды. Республика бойынша Алматы облысының спорты алғашқы бестікке кіреді. Спорттық нысандар да бой көтеріп, бұқаралық спортты дамытуға өз үлесін қосуда. Мәселен, жыл басынан бері 910 шара өткізіліп, оған 569 000 адам тартылған. Ал бұқаралық спортты дамытудағы көрсеткіш 2016 жылы 26,6% болса, 2017 жыл 28,4% құрап отыр. Жыл өткен сайын халықтың спортқа деген қызығушылығы артып келеді. Жыл басынан республикалық, халықаралық жарыстарда облыс спортшылары 1012 медаль жеңіп алды. Оның ішінде 374 алтын, 323 күміс, 315 қола медаль. Ұлттық құрама сапына 44 спорт түрі бойынша облыстың 857 спортшысы енген. Осындай жаңалықтардан хабардар еткен басқарма басшысы алдағы уақытта да атқарылатын жұмыстардың көп екенін жеткізді. Мұнан кейін облыс әкімінің орынбасары Жақсылық Омар басқарма басшысына бірқатар мәселелерді алға тартып, жұмысын сынға алды. Мысалға бокстан облыстың құрамасы ел чемпионатында нәтижелі көрсеткіш көрсете алмады. Осы тұрғыда боксшылардың жеңіске жетпеуіне не себеп екендігін сұрады. Тұратбек Төлеубекұлы бокста облыс спортшыларының жүлделі орынға жете алмағанымен төменгі орынға түсіп қалмағандығын айтты. Бірақ оған Жақсылық Мұқашұлы бұл нақты себеп емес екенін айтып, жұмыстарында жүйе жоқтығын сынға алды. Мұнан кейін облыстық білім басқармасының басшысы Дәурен Жүнісов ортаға шығып мектеп жасындағы балалардың спортқа қамтылуы жайлы ақпар берді. Нақты сандарды келтіре отырып жасаған баяндамасының соңында негізгі проблемаларды да келтіре кетті. Көптеген мектепте спорттық материалдық базаның және кей мектепте спорт залдың жоқтығы жайлы әңгіме қозғады. Бұл мәселеден облыс әкімі де құлағдар екенін айтып, бүгінде негізгі құжаттары дайындалып, алдағы уақытта шешімін табады деп сенеміз деді. Кезек-кезегімен сөз алған аудандық спорт бөлімдерінің басшылары өз жетістіктерін жіпке тізгендей баяндады. Бұлай құрғақ ақпаратты айта бермей жандандыру керек екенін жеткізді Жақсылық Мұқашұлы. Мәселен Талғар ауданында қысқы спорт түрін дамытуды, одан кейін олимпиадалық спорт түріне бірінші көңіл бөліп, қалған түрлерін кезеңімен қолға алуды тапсырды. Олимпиадалық спорт түрі еліміздің атын шығарып, мемлекеттің беделін көтеретінін тағы да баса айтты. Мұнан кейінгі сын ескертпе облыстық спорт басқармасына қайта қарата айтылды. Көптеген ауданда әлі күнге дейін спорт шебері, халықаралық дәрежедегі спорт шебері шықпағанын жеткізді. Бұл ретте аудан әкімдерінің орынбасарларын тұрғызып, нақты тапсырма жүктеді. Сонымен қатар арнайы комиссия құрып, барлық аудандардағы спорттық саланы тексеріп, наурыз айында шешімін шығаруды тапсырды. Және ауылдардағы спорт саласына байланысты жұмыс істеп жүрген нұсқаушылардың да жұмысын нақтылап, бекзат өнерге көңіл бөлуді тапсырды.
Ришад ТҰРҒАНБАЕВ.
