УЕФА Чемпиондар лигасының негізгі кезеңінде ойнап жатқан «Қайрат» (Алматы) 7 айналымда «Астана аренада» (Астана) «Брюгге» (Бельгия) командасын қабылдап, 1:4 есебімен жеңілді. Бұл «Қайраттың» негізгі кезеңде өз алаңында өткізген соңғы матчы болатын, – деп хабарлайды 7-su.kz ақпараттық порталы.
Чемпиондар лигасының ойыны қаңтарда болғандықтан Алматыдан Астанаға ауысып, «Астана аренада» өтті. Осыған дейін турнирдің аясында өз алаңында гол сала алмай келе жатқан «Қайрат» елордадағы алғашқы ойында қарсылас қақпасының кілтін тапты.
«Қайрат» (Қазақстан) – «Брюгге» (Бельгия) – 1:4 (0:2)
Голдар: Александр Станкович, 32 (0:1), Ханс Ванакен, 38 (0:2), Ромео Верман, 74 (0:3), Брэндон Мехеле, 84 (0:4), Әділет Садыбеков, 90+2 (1:4).
«4 гол жіберседе, Месси сияқты тойлады». Дәл осындай тақырыппен бельгияның RTL.be сайты жариялады. Онда командасының 4 гол өткізіп алғандығына қарамастан, Әділет Садыбеков үстіндегі жейдесін шешіп, Месси сияқты (2017 жылы «Реалға» гол салғаннан кейінгі жасағаны) тойлағанын жазған.
Ал Әділет болса ойыннан кейін журналистерге берген ойын жөнінде пікірінде: «Өткен маусым мен үшін оңай болған жоқ, сол сәтте маған сенбегендер үшін көрсеттім. Бұл ешқандайда Мессидікін көшіру емес, голымды осылай тойлағым келді және солай істедім»,-деді.
Ал журналист Елдар Аманбаев: «Бұл Әділет Садыбековтың жалпы «Қайрат» жейдесіндегі соңғы голы. Әрине, егер келесі ойында «Арсеналға» гол салмаса. Одан кейін ол клуб ауыстырады»,-деді.
