Волейболдан Қазақстан ұлттық құрамасының кейінгі ойындары жанкүйерлер көңілінен шығып жатпағаны анық. Қатысқан турнирлерінде сүрініп, көңілді күпті етіп қойғаны бар. Асқар Шалқыбеков жаттықтыратын құрама Қытайдың Тяньцзинь қаласында өткен Азия чемпионатында топтан шықпай қалды. Осыған дейін тек 2011 және 1999 жылы құрлық чемпионатында топтан ары аспаған еді.
Қытайдағы құрлық чемпионатында Қазақстан құрамасы «В» тобында ойнап, Индонезиямен (0:3 – 22:25, 22:25, 23:25), Таиландтан (1:3 – 22:25, 16:25, 25:23, 11:25) жеңіліп, Аустралияны (3:0 – 25:21, 25:18, 25:21) жеңген. Алайда 3 ұпай топтан шығуға көмектеспеді (басқа топтан 3-орын алған нәтижелі 2 команданы келесі кезеңге өткізді). Осылайша Асқар Шалқыбековтің бір бармағы бүгулі қалпы жарысты ерте аяқтады. Бапкер болса кеткен есе Азия ойындарында қайтады деп сендірді.
Ал қыркүйекте Жапонияда болатын Азия ойындарына дайындықты ұлттық құрама Талдықорғанда өткізеді. Осыған дейінгі жарыстарға Түркістан, Алматыда жаттыққан еді. Азия ойындарындағы Қазақстан құрамасының қарсыласы (В тобы) – Қытай, Филиппин құрамасы.
– Әрине, кейінгі ойындардан кейін көпшіліктің көңіліне күдік ұялағаны анық. Біз дәл осы құраммен алғаш рет жарысқа қатыстық. Көрдік. Үйрендік. Келесі жарыста барымызды саламыз. Азия ойындарында басқа ойын көрсетеміз деген сенімдемін, – дейді Қазақстан Ұлттық құрамасының ойыншысы Перизат Нұрбергенова.
